स्याङ्जाली भाकामा रेखा पोखरेल र अभिषेक लम्सालको नयाँ गीत ‘ज्याग्दि तरेर’

गायिका रेखा पोखरेल र गायक अभिषेक लम्सालको सुमधुर स्वरमा सजिएको नयाँ पन्चेबाजा गीत ‘ज्याग्दि तरेर’ सार्वजनिक भएको छ। लोक तथा दोहोरी गीतको क्षेत्रमा आफ्नो छुट्टै पहिचान बनाउन सफल पोखरेल र लम्सालको सहकार्यमा तयार भएको यो गीत अभिषेक लम्साल (Abishek Lamsal) को आधिकारिक युट्युब च्यानलमार्फत बजारमा आएको हो।

स्याङ्जाको प्रसिद्ध ठाउँ ‘ज्याग्दी’ र कालीगण्डकी वरपरको परिवेशलाई समेटेर तयार पारिएको यस गीतमा मौलिक पन्चेबाजाको ताल र ठेट शब्दहरूको संयोजन रहेको छ। विवाह, व्रतबन्ध तथा शुभकार्यमा नाच्न र गाउन मिल्ने गरी तयार पारिएको यस गीतको भिडियोमा पनि मौलिकता झल्किने दृश्यहरू देख्न सकिन्छ। गीतको शब्द, सङ्गीत र भिडियो निर्माणमा संलग्न कलाकारहरूले यसलाई उत्कृष्ट बनाउन निकै मिहिनेत गरेको भिडियोबाट प्रस्ट हुन्छ। गीत सार्वजनिक भएलगत्तै दर्शक तथा श्रोताहरूबाट सकारात्मक प्रतिक्रियाहरू आउन थालेका छन्।

भिडियो सार्वजनिक भएपछि युट्युबको कमेन्ट बक्समा दर्शकहरूले गीतको प्रशंसा गरेका छन्। एक दर्शकले लेखेका छन्, "अति मिठो गीत, मार्मिक शब्दमा भरिएको गीत जति हेरे पनि धित नपुग्ने। हजुरहरू सम्पूर्ण टिममा हार्दिक मंगलमय शुभकामना।" अर्का शुभेच्छुकले प्राविधिक पक्षको तारिफ गर्दै लेखेका छन्, "गीत निक्कै राम्रो बनेको छ, यसको भिडियो सम्पादन अझ बेजोड छ।" त्यस्तै, अर्का दर्शकले आफ्नो उत्साह व्यक्त गर्दै लेखेका छन्, "जति उत्साहित (excited) भएको थिएँ, त्यो भन्दा राम्रो लाग्यो गीत।" दर्शकको यस्तो माया र प्रतिक्रियाले निर्माण टिमलाई थप हौसला मिलेको छ।