भीरकोट नगरपालिकाद्वारा चाडपर्व लक्षित बजार अनुगमन, म्याद गुज्रिएका सामग्री जफत

चाडपर्वलाई लक्षित गर्दै भीरकोट नगरपालिकाले बजार अनुगमन गरेको छ। नगर उपप्रमुख भगवती रेग्मी अर्यालको नेतृत्वमा गरिएको अनुगमनका क्रममा बयरघारी बजारका ३३ वटा व्यवसायको निरीक्षण गरिएको हो।

अनुगमनका क्रममा २२ वटा खाद्यान्न तथा किराना पसल, ४ वटा मासु पसल, ४ वटा स्टोर्स तथा सप्लायर्स, एक होटल, एक भेटेरिनरी पसल र एक सहकारी पसलको निरीक्षण गरिएको थियो। सो क्रममा सानो परिमाणमा दालमोठ, मसला लगायतका म्याद गुज्रिएका सामग्री फेला परेपछि जफत गरिएको राजस्व शाखाका शिवजी शर्माले जानकारी दिए।

नगर उपप्रमुख रेग्मीले बजारलाई स्वच्छ, सुरक्षित र उपभोक्तामैत्री बनाउन नगरपालिकाले बजार अनुगमन गरेको बताइन्। व्यवसाय दर्ता नविकरण भए नभएको, पालिकामा व्यवसाय कर तिरे नतिरेको समेत अनुगमन गरिएको उनले जानकारी दिइन्।

अनुगमन टोलीले व्यवसायीहरूलाई खाद्य सामग्रीको उत्पादन तथा उपभोग्य मिति अनिवार्य जाँच गर्न, म्याद गुज्रिएका तथा गुणस्तरहीन वस्तु बिक्री नगर्न, भान्छा र पसलको सरसफाइमा ध्यान दिन, मूल्यसूची राख्न, नापतौलमा शुद्धता कायम गर्न र ग्राहकलाई अनिवार्य बिल उपलब्ध गराउन निर्देशन दिएको छ।

त्यस्तै, उपभोक्तालाई पनि खाद्य सामग्री खरिद गर्दा उत्पादन मिति, उपभोग्य मिति, मूल्य र गुणस्तर जाँच गरेर मात्र खरिद गर्न तथा शंकास्पद वा म्याद गुज्रिएका वस्तु बिक्री गरेको पाइएमा सम्बन्धित निकायमा जानकारी गराउन आग्रह गरिएको छ।

अनुगमनमा दहथुम प्रहरी चौकीका प्रमुख पुष्कर पोख्रेल, नगरपालिकाका प्रशासन शाखा प्रमुख सिताराम खनाल, नगर प्रहरी प्रमुख नारायणप्रसाद तिवारी, भीरकोट उद्योग वाणिज्य संघका अध्यक्ष नुवादत्त अर्याल तथा पत्रकार रोशन रेग्मीलगायतको सहभागिता रहेको थियो।

बजारलाई स्वच्छ, सुरक्षित र उपभोक्तामैत्री बनाउन स्थानीय सरकारको सक्रियता आवश्यक रहेको सरोकारवालाहरूले बताएका छन्। यद्यपि, स्थानीय सरकारहरूले नियमित बजार अनुगमनमा पर्याप्त चासो नदिँदा स्याङ्जाका विभिन्न स्थानीय बजारमा व्यवसायीको मनोमानी बढेको उपभोक्ताको गुनासो छ।