राष्ट्रपति शिल्डको उपाधि त्रि–शहिदलाई

आँधीखोला गाउँपालिकाले आयोजना गरको छैटौँ राष्ट्रपति रनिङ शिल्ड प्रतियोगिता– २०८२ को उपाधि त्रि–शहिद माध्यमिक विद्यालयले जितेको छ । त्रि–शहिदले ९ स्वर्ण, ६ रजत र ८ कास्य पदक जित्दै पहिलो बन्दै ६० हजार नगद सहित रनिङ शिल्ड, कप, मेडल र प्रमाणपत्र हात पारेको हो । 

त्रि–शहिदले अहिले सम्म खेलाइएका ६ वटै प्रतियोगिता जित्दै दोस्रो पटक रनिङ शिल्ड जितेको  हो । वडा नं –६ सिम्ले खेलमैदानमा गरिएको प्रतियोगितामा ९ स्वर्ण, १ रजत र ५ कास्य जितेको पद्युम्न पनेरु द्धितीय र ६स्वर्ण, ८ रजत र ३ कास्य जितेको श्रवण मावि तृतीय बनेको हो । द्वितीयले ४० हजार र तृतीयले २० हजार सहित कप, मेडल र प्रमाणपत्र हात पारेको हो । 

प्रतियोगितामा पालिका अध्यक्ष विश्वनाथ पौडेलले विजयी खेलाडीलाई पुरस्कार वितरण गर्नु भएको थियो । पुस २८ गतेबाट सुरु भएको प्रतियोगितामा भलिबल, कबड्डी, लङजम्प, हाइजम्प, त्रिपल जम्प, एथलेटिक्स लगायतका खेलहरु भएका थिए । १२ विद्यालयका नौ सय विद्यार्थी सहभागी प्रतियोगितामा ३० स्वर्ण, ३० रजत र ३० कास्यमा प्रतिस्पर्धा गरिएको थियो ।