कालीगण्डकी गोल्डकपको उपाधी होराइजन क्बललाई

द राइजिङ ग्रुपले आयोजना गरेको आठौँ कालीगण्डकी गोल्डकप फुटबल प्रतियोगिताको उपाधि होराइजन क्लब वालिङले प्राप्त गरेको   छ । बुधबार चापाकोट नगरपालिका स्थित गंगालाल माध्यमिक विद्यालयको खेलमैदानमा भएको गोल्डकपको फाइनल खेलमा होराइजन क्लब वालिङले ज्योतिपुञ्ज युवा क्लब, रामपुरलाई १ गोलले  पराजित गर्दै उपाधि हात पारेको  हो ।

निर्धारित समयमा गोल हुन नसकेपछि खेलको टाइब्रेकरमा दुवै टोलीले ४-४ गोल गरेपछि सडन डेथमा  होराइजन क्लब वालिङले ६- ५ को जित निकालेको हो । आठौँ संस्करणको कालीगण्डकी गोल्ड कपको उपाधिसँगै होराइजन क्लब वालिङले ३ लाख नगद प्राप्त गरेको छ ।

त्यसैगरी उपविजेता भएको  ज्योतिपुञ्ज युवा क्लब रामपुरले १ लाख ५० हजार नगदसहित ट्रफी, शिल्ड र मेडल प्राप्त गरेको छ ।

मंगलबार भएको पहिलो सेमिफाइनल खेलमा बौद्ध शान्ति फुटबल क्लब पोखराविरुद्ध पेनाल्टी सुटआउटमा होराइजन क्लब वालिङले ५-४ को जित निकालेर फाइनलमा प्रवेश गरेको थियो ।

त्यसैगरी अर्को सेमिफाइनल खेलमा ज्योतिपुञ्ज युवा क्लब रामपुरले गोर्खा फुटबल क्लवलाई २-० ले पराजित गरेर फाइनलमा प्रवेश गरेको थियो । फुटबल  प्रतियोगितामा स्याङ्जा, कास्की, गोरखा, पर्वत र पाल्पाका आठ टिमले सहभागीता जनाएका थिए ।