संघीयताको असल अभ्यास: संघ, प्रदेश र स्थानीय सरकारको सहकार्यमा बन्यो आधारभूत स्वास्थ्य सेवा केन्द्र

स्याङ्जाको कालीगण्डकी गाउँपालिकामा संघ, प्रदेश र स्थानीय सरकारको समन्वयमा वैघा आधारभूत स्वास्थ्य सेवा केन्द्र निर्माण भएको छ। गाउँपालिकाको वडा नं ३ वैघा भञ्ज्याङमा संघ, प्रदेश र स्थानीय सरकारको सहकार्यमा आधुनिक आधारभूत स्वास्थ्य सेवा केन्द्र निर्माण गरिएको हो।

 संघीय विशेष अनुदान   १ करोड ,गण्डकी प्रदेश सरकारको  ४० लाख र कालिगण्डकी गाउँपालिकाको ३४ लाख ५४ हजार ३ सय ७३ रूपैयाँको लागतमा आधारभूत  स्वास्थ्य सेवा केन्द्र  निर्माण गरिएको गाउँपालिकाका अध्यक्ष खिम बहादुर थापाले   जानकारी दिनुभयो।

वि.सं. २०७९ फागुन १४ गते निर्माण सम्झौता भएको भवन १ करोड ७४ लाख ५४ हजार ३ सय ७३ रूपैयाँ २२ पैसाको लागतमा सम्पन्न भएको हो। ८ कोठा , ३ वटा शौचालय सहितको आधुनिक पक्की भवनमा एसी,खानेपानी, अग्नि नियन्त्रक, सिसि क्यामराको व्यवस्था गरिएको छ।

वडा नं ३ का वडा अध्यक्ष देवेन्द्र कुमार थापाले लामो समयसम्म भाडाको घरबाट एवं साँगुरो ठाउँबाट सेवा प्रवाह गर्नुपर्ने बाध्यता अन्त्य भएकोमा खुशी व्यक्त गर्नुभयो।

एउटा सँगुरो कोठामा सिमित स्वास्थ्य सेवा केन्द्र  आधुनिक र फराकिलो भवनमा सरेपछि  स्वास्थ्य सेवा प्रदान गर्न सहज भएकोमा  सेवा केन्द्र प्रमुख उमा सोमैले खुशी व्यक्त गर्नुभयो। उहाँका अनुसार   करिब २ हजार २ सय वडाबासीले  नवनिर्मित स्वास्थ्य सेवा केन्द्रबाट निशुल्क आधारभूत स्वास्थ्य सेवा प्राप्त गर्ने छन्।

नवनिर्मित आधारभूत स्वास्थ्य केन्द्रको, वडा नं ३ को कार्यालय र वैघा रिडि सडकको शनिबार एक औपचारिक  कार्यक्रममा समुद्घाटन भएको छ। नवनिर्मित ३ वटै पूर्वाधारको समुद्घाटन नेपाल सरकारका अर्थमन्त्री विष्णु प्रसाद पौडेले गर्नुभएको गर्नुभएको हो।