वालिङ नगरपालिकाका ७१ विद्यालयमा एचपिभी खोप अभियान सञ्चालन

स्याङ्जाको वालिङ नगरपालिकाले पाठेघरको मुखको क्यान्सर रोकथाम तथा निराकरण गर्ने उद्देश्यका साथ नगरभित्रका छात्राहरूका लागि एचपिभी (HPV) खोप अभियान सञ्चालन गरेको छ। नगरपालिका क्षेत्रभित्र रहेका ५९ वटा सामुदायिक र १२ वटा संस्थागत (निजी) गरी कुल ७१ वटा विद्यालयका कक्षा ६ मा अध्ययनरत छात्राहरूलाई लक्षित गर्दै यो स्वास्थ्य अभियान अगाडि बढाइएको हो।

नगरपालिकाका स्वास्थ्य शाखा प्रमुख कमल पाण्डेका अनुसार, यस अभियान अन्तर्गत कक्षा ६ मा अध्ययनरत कुल ४०९ जना छात्रामध्ये हालसम्म ३९९ जनालाई सफलतापूर्वक यो खोप प्रदान गरिसकिएको छ। केही विद्यालयहरूमा खोप लगाउने कार्य अझै जारी रहेकोले शुक्रबार मात्रै पहिलो चरणको अभियान पूर्ण रूपमा सम्पन्न हुने शाखा प्रमुख पाण्डेले जानकारी दिएका छन्। यस अभियानले नगरभित्रका छात्राहरूको स्वास्थ्य सुरक्षा गर्दै भविष्यमा हुन सक्ने गम्भीर प्रकृतिको क्यान्सर रोगको जोखिम न्यूनीकरण गर्न महत्त्वपूर्ण भूमिका खेल्ने विश्वास नगरपालिकाले लिएको छ।