बिरुवाको बजेट ४८ करोड ६० लाख :  बजेटमा सडक पूर्वाधारलाई प्राथमिकता 

स्याङ्जा जिल्लाको बिरुवा गाउँपालिकाले आर्थिक २०८२/८३ को बजेट सार्वजनिक गरेको छ।  १७ औं गाउँसभा अधिवेशनमा गाउँपालिका उपाध्यक्ष भगवती शर्माले आर्थिक वर्ष २०८२/०८३ को लागि ४८ करोड ६० लाख ५८ हजार ५ सय ६१ रुपैयाँ बराबरको अनुमानित बजेट प्रस्तुत गर्नुभएको हो।

बजेटमा नेपाल सरकारबाट वित्तीय समानीकरण अनुदान तर्फ ८ करोड ४६ लाख, नेपाल सरकार बाट सशर्त अनुदान तर्फ २२ करोड ७३ लाख ९७ हजार, सङ्घीय राजश्व बाँडफाँट तर्फ ७ करोड २० लाख अनुमान गरिएको छ । यसैगरी प्रदेश वित्तीय समानीकरण अनुदानतर्फ १ करोड ६ लाख ७० हजार, प्रदेश राजश्व बाँडफाँटतर्फ ७२ लाख २ हजार, प्रदेश समपूरक अनुदान तर्फ रु. ६० लाख, प्रदेश विशेष अनुदान रु. ४० लाख रहेको छ । सङ्घीय विशेष अनुदानतर्फ रु. १ करोड २९ लाख र सङ्घीय समपूरक तर्फ १ करोड २२ लाख अनुमान गरिएको छ । बचत रु.३ करोड १५ लाख र आन्तरिक आयश्रोत तर्फ १ करोड १० लाख प्राप्त हुने अनुमान गरिएको छ । आगामी आर्थिक वर्षका लागि चालु खर्चतर्फ रु. ३५ करोड ३२ लाख ६ हजार ५ सय ६१ प्रस्ताव गरिएको छ। यो कूल बजेटको ७२.६६ प्रतिशत हुनु आउँछ । यसमध्येबाट गाउँपालिका अन्तर्गत रहेका सम्पूर्ण जनप्रतिनिधिको सेवा सुविधा , कर्मचारी र शिक्षकहरुको तलब भत्ता तथा कार्यालय सञ्चालन खर्चसमेत प्रस्ताव गरिएको छ।

पूँजीगत खर्चतर्फ आर्थिक विकास क्षेत्रमा १३.१४ प्रतिशत, सामाजिक विकास क्षेत्रमा २२.२८ प्रतिशत, भौतिक पूर्वाधारमा ५१.४७ प्रतिशत, वन वातावरण तथा विपद व्यवस्थापनमा ७.६५ प्रतिशत, संस्थागत विकास तथा सेवा प्रवाहमा ५.४६ प्रतिशत गरी कूल १३ करोड २८ लाख ५२ हजार विनियोजन गरिएको छ।

 बजेटमा सडक पूर्वाधार विकासलाई प्राथमिकता दिइएको छ। बजेटमा  ललाङ् तर्ले कुसुमभञ्ज्याङ् सडकका लागि रु १ करोड ७५ लाख, भुवान चिन्नेवास राम्कीथुम्की सडक स्तरोउन्नती रु ८६ लाख, भन्ज्याङ बाहु बिरुवा सडक स्तरोउन्नती रु ४० लाख, बेलघारी मेथाभुरुङ सपाउँदे सडक स्तरोन्नति रु. ४० लाख, खाली बिरुवा सडकका लागि रु ३० लाख, बिरुवा शिखरसिंह दह सडक स्तरोन्नतीका लागि रु २५ लाख विनियोजन गरिएको छ । हरेक वडामा रणनीतिक महत्वको एउटा सडक स्तरोन्नति गर्न ५ लाख बजेट विनियोजन गरिएको छ भने  पालिकास्तरीय अस्पताल सञ्चालनको लागि रु. ७० लाख रुपैया विनियोजन गरेको छ ।

आगामी आर्थिक वर्षको बजेटमा भवन तथा सडक पूर्वाधारकासाथै कृषि, शिक्षा र रोजगारको क्षेत्रलाई प्राथमिकतामा पारिएको छ । जसमा वास्तविक कृषकको पहिचान गरी कृषि उत्पादनलाई थप प्रभावकारी बनाउन कृषक अनुदानमा रु.२० लाख, ५० प्रतिशत अनुदानमा कृषि बीउविजन वितरण कार्यक्रमको लागि बजेट व्यवस्था गरिएको छ । यो सँगै बजारोन्मुख बस्तीहरुको भित्रि बाटो निर्माण र सामुदायिक भवन निर्माणमा उपभोक्ता सँग साझेदी गर्न समेत आवश्यक बजेट विनियोजन गरेको छ । 

यसैगरी शिक्षा तर्फ कक्षा १ देखि ५ सम्मका विद्यार्थीलाई प्रोत्साहन स्वरुप पोषणयुक्त खाजा व्यवस्था गर्न सङ्घीय सरकारले तोकेको दरमा वृद्धि गर्न रु. १० लाख बजेट विनियोजन गरिएको छ । शिक्षालाई गुणस्तरीय र प्रविधि मैत्री बनाउनका लागी रु. १ करोड २९ लाख विनियोजन गरिएको छ। 

प्रधानमन्त्री कार्यक्रम मार्फत बेरोजगार सूचीमा सूचिकृत १ सय दिन बराबरको रोजगारी प्रदान गरिएकोमा साझेदारीको लागि रु. १३ लाख ७५ हजार बजेट व्यवस्था गरिएको छ । अनौपचारिक क्षेत्रमा रहेका श्रमिक तथा कामदारहरुलाई र करार सेवामा कार्यरत कर्मचारीलाई सामाजिक सुरक्षा कोषमा आवद्धता गर्नका लागि रु.२५ लाख बजेटको व्यवस्था गरेको छ । पालिकाले पर्यटन प्रवर्धनका लागि ५ लाख र विपद् व्यवस्थापनका लागि १० लाख बजेट विनियोजन गरेको छ।

यही असार ६ गते गाउँपालिकाको १७ औं अधिवेशनको आगामी आर्थिक वर्षको नीति तथा कार्यक्रम सम्पन्न गरेको बिरुवा गाउँपालिकामा मङ्गलबार आर्थिक वर्ष २०८२/०८३ को अनुमानित बजेट प्रस्तुतसँगै सर्वसम्मतले पारित भएको हो ।

 गाउँ सभाकै अवसर पारेर बिरुवा गाउँपालिकाले  सहायक प्रशासकीय अधिकृतहरू दिपक ढुंगाना र सुन्तली श्रीसलाई उत्कृष्ट कर्मचारी पुरस्कारसहित  सम्मान गरेको छ ।