आँधिखोला सहकारी २० वर्षमा प्रवेश

भीरकोट नगरपालिका १ बयरघारीमा रहेको आँधिखोला बचत तथा ऋण सहकारी संस्था लि. २० वर्षमा प्रवेश गरेको छ।  सहकारीले  उन्नाइसौं वार्षिक साधारणसभा समेत शनिवार सम्पन्न भएको छ । संस्थाको अध्यक्ष तोयनाथ अर्यालको अध्यक्षतामा भएको कार्यक्रममा विभिन्न संघ संस्थाका प्रमुख तथा प्रतिनिधीहरु लगायत संस्थाका शेयर सदस्यहरुको उल्लेखनीय उपस्थिती रहेको थियो ।

संस्थाका व्यवस्थापक श्री ठगेन्द्र जि.टी. (सुनिल) ले संचालन गरेको उन्नाइसौं वार्षिक साधारण सभामा संचालक समितिको तर्फवाट अध्यक्ष  तोयनाथ अर्याल, लेखा सुपरीवेक्षण समितिको तर्फवाट संयोजक जब्बर अलि मिया र व्यवस्थापनको तर्फबाट  ठगेन्द्र जि.टी. (सुनिल) ले वार्षिक प्रगति प्रतिवेदन प्रस्तुत गरेका थिए ।

संस्थाले अवलम्वन गर्दै आएका कृयाकलापहरुमध्ये उन्नाइसौं वार्षिक साधारण सभामा विभिन्न विधामा सम्मान कार्यक्रम गरिएको थियो। जसमध्ये २०८२ सालको एसईई परीक्षामा उत्कृष्ट अकं प्राप्त गर्ने संस्थाका शेयर सदस्यका सन्ततिहरुलाई विद्यार्थीतर्फ, उमेरले ७० वर्ष पुरा हुनुभएका आठ जनालाई जेष्ठ शेयर सदस्य तर्फ एवं असल कारोवारीको रुपमा बचत कारोबार तर्फ २ जना र कर्जा कारोबार तर्फ २ जनालाई सम्मान गरिएको थियो ।

उन्नाइसौं वार्षिक साधारण सभामा नगर प्रमुख गोविन्द कुमार कर्माचार्य, शेषकान्त खनाल, श्यामकाजी अधिकारी, यामप्रसाद अधिकारी (लक्ष्मण), कृष्ण बहादुर अधिकारी क्षेत्री, पिताम्बर श्रेष्ठ र  छायाराम खनालले संस्थाको   श्रीवृद्धिको लागि रचनात्मक सुझावहरु प्रस्तुत गरेका थिए ।

उक्त साधारण सभामा प्रस्तुत २०८२।०८३ को वार्षिक प्रगति प्रतिवेदन र २०८३/०८४को लागि लक्षित निति, कार्यक्रम, वार्षिक योजना र खर्च बजेट सर्वसम्मतबाट पारित गरिएको थियो ।

१ हजार ११३ शेयर सदस्य रहेको सहकारीमा शेयर पूँजी २ करोड ५५ हजार ९ सय रूपैयाँ, ८ करोड ९ लाख ७७ हजार ३१२ रूपैयाँ र कुल कारोबार करिब १३ करोड रूपैयाँ रहेको संस्थाले जनाएको छ।