सामाजिक उत्तरदायित्व अन्तर्गत पोशाक र कम्प्युटर सहयोग 

मुक्तिनाथ विकास बैंक लिमिटेडले सामाजिक उत्तरदायित्व कार्यक्रम अन्तर्गत विद्यालयलाई सहयोग गरेको छ। बैंकले  स्याङ्जाको पुतलीबजार नगरपालिका –१३ स्थित महेन्द्र आधारभूत विद्यालयका ५३ विद्यार्थीलाई विद्यालय पोशाक र विद्यालयको प्रशासनिक कार्यका लागि एक थान कम्प्युटर सेट हस्तान्तरण गरेको हो ।

विद्यालयमा आयोजित कार्यक्रममा बैंक सञ्चालक समिति सदस्य भरतप्रसाद लम्सालले मुक्तिनाथ विकास बैंक सदैव जनतासँगै रहेर सामाजिक उत्तरदायित्वका कार्य गर्दै आएको बताउनुभयो । 

लम्सालले पुतलीबजार नगरपालिकामा स्थापित बैंकका हैसियतले यहाँका विद्यालयहरूको शैक्षिक उन्नतिमा विशेष प्राथमिकता दिइरहेको उल्लेख गर्दै वडा –१३ का सम्पूर्ण विद्यालयमा आवश्यक सामग्री उपलब्ध गराउने प्रतिबद्धता पनि जनाउनु भएको थियो ।कार्यक्रममा वडा सदस्य सुर्यबहादुर रोकाहा, मुक्तिनाथ विकास बैंकका क्षेत्रीय प्रबन्धक ऋषि ढकाललगायतले शुभकामना मन्तव्य  राख्नुभएको थियो । 

वि.सं. २०६३ सालमा स्थापना भएको मुक्तिनाथ विकास बैंकका हाल देशभर १७८ शाखा सञ्चालनमा छन् । “जनता बैंकसम्म होइन, बैंक जनतासम्म” भन्ने उद्देश्यका साथ बैंकले आफ्नो सेवा विस्तार गरिरहेको छ ।