विपद् प्रभावित परिवारलाई लायन्सद्वारा   राहत सामग्री वितरण

लायन्स  क्लबले आँधिखोला गाउँपालिकाका विपद् प्रभावित परिवारलाई राहत सामग्री वितरण गरेको छ। लायन्स क्लब  इन्टरनेसनल, डिस्ट्रिक्ट ३२५ एमको पहलमा स्याङ्जाको आँधिखोला गाउँपालिका–२, बसेबारी र वडा नं. ३, अढेखाल्टाका विपद् प्रभावित परिवारलाई रु. १ लाख ५० हजार बराबरको जस्तापाता लगायत राहत सामग्री वितरण गरिएको हो।

विपद् बाट प्रभावितजस्ता ५ घरधुरीलाई जस्ता पातासहितकाे राहत सामाग्री प्रदान गरिएको  लायन्स शिवराज आचार्यले जानकारी दिए।  विपद् प्रभावित  परिवारलाई सहयोग पुर्‍याउने उद्देश्यले आयोजित राहत वितरण कार्यक्रममा लायन्स क्लबका पदाधिकारी, जनप्रतिनिधि तथा सामाजिक व्यक्तित्वहरूको सहभागिता रहेको थियो।

कार्यक्रममा लायन्स क्लबका फर्स्ट भाइस डिस्ट्रिक्ट गभर्नर किशोर बराल, डिस्ट्रिक्ट चिफ एड्भाइजर शिवराज आचार्य, असिस्टेन्ट चिफ एड्भाइजर श्रीबहादुर गुरुङ, क्लस्टर चिफ दिनेशबाबु खड्का, बाबुराम सापकाेटा, डिपार्टमेन्ट चिफ पुरुषोत्तम पौडेल, लायन्स क्लब पुतलीबजारका अध्यक्ष देवी अधिकारी, लायन्स क्लब स्याङ्जा टाउनका अध्यक्ष निर्मला हमाल तथा लायन्स क्लब माछापुच्छ्रे भिलेजका दीपेन्द्र पौडेल र ईश्वर केसीलगायतको उपस्थिति रहेको थियो।

त्यसैगरी राहत वितरण कार्यक्रममा आँधिखोला गाउँपालिका–२ का वडाध्यक्ष कमल पौडेल, वडा नं. ५ का वडाध्यक्ष कृष्णप्रसाद पनेरु तथा सामाजिक व्यक्तित्वहरू ओमप्रकाश सापकोटा, चनक ऋषि लामिछाने, सुमन गुरुङ, मातृका सुवेदी र दीपेन्द्र तिमिल्सिनालगायत सहभागी थिए।

फर्स्ट भाइस डिस्ट्रिक्ट गभर्नर किशोर बरालले लायन्स क्लबले मानव सेवा तथा सामाजिक उत्तरदायित्वका क्षेत्रमा विभिन्न कार्यक्रम सञ्चालन गर्दै आएको उल्लेख गर्दै आगामी दिनमा पनि सेवामूलक गतिविधिलाई निरन्तरता दिने प्रतिबद्धता व्यक्त गरे।

त्यसैगरी गाउँपालिका अध्यक्ष विश्व पौडेलले राहत वितरण कार्यक्रम गाउँपालिकामा ल्याउन योगदान पुर्‍याउने लायन्स क्लबका पदाधिकारी तथा सदस्यहरूप्रति धन्यवाद व्यक्त गरेका थिए।कार्यक्रममा विपद् प्रभावित परिवारलाई जस्तापाता लगायत राहत सामग्री हस्तान्तरण गरिएको थियो।

विपद् प्रभावित परिवारलाई राहत उपलब्ध गराउने यस कार्यले मानवीय सहयोग, सामाजिक सहकार्य तथा विपद्का समयमा प्रभावित समुदायलाई सहयोग पुर्‍याउने लायन्स क्लबको प्रयासलाई प्रतिबिम्बित गरेको छ।