बाढी पीडितका लागि स्याङ्जाका चार पालिकाको  १६ लाख रुपैयाँ सहयोग 

रसुवाको भोटेकोशी हुँदै त्रिशूली नदीमा आएको भीषण बाढीबाट प्रभावितको उद्धार, राहत तथा पुनःस्थापनाका लागि स्याङ्जाका चार स्थानीय तहले १६ लाख रुपैयाँ सहयोग गर्ने भएका छन् ।

बुधबार चीनको तिब्बततर्फबाट रसुवाको भोटेकोशी हुँदै त्रिशूली नदीमा आएको बाढीका कारण रसुवा, धादिङ, नुवाकोट, गोरखालगायत जिल्लामा ठूलो मानवीय तथा भौतिक क्षति भएको छ ।

बाढीबाट भएको क्षतिप्रति दुःख व्यक्त गर्दै स्याङ्जाका स्थानीय तहले पालिकाको तर्फबाट तथा जनप्रतिनिधि र कर्मचारीबाट समेत रकम संकलन गरी सहयोग गर्न लागेका हुन् ।

भीरकोट नगरपालिकाले संस्थागत रूपमा पाँच लाख रुपैयाँ सहयोग गर्ने निर्णय गरेको छ । साथै जनप्रतिनिधि तथा कर्मचारीबाट थप दुई लाख रुपैयाँ सहयोग गर्ने र कर्मचारी तथा शिक्षकको पाँच दिन बराबरको तलब सुविधाबाट समेत रकम संकलन गर्ने जनाएको छ ।

चापाकोट नगरपालिकाले राहत तथा उद्धारका लागि पाँच लाख रुपैयाँ सहयोग गर्ने भएको छ । नगरपालिकाका जनप्रतिनिधिको पाँच दिन बराबरको तलब–भत्ता प्रधानमन्त्री दैवी प्रकोप उद्धार कोषमा जम्मा गर्ने निर्णयसमेत गरिएको छ ।

हरिनास गाउँपालिकाले पाँच लाख रुपैयाँ प्रधानमन्त्री दैवी प्रकोप उद्धार कोषमा उपलब्ध गराउने निर्णय गरेको छ । यस्तै, अर्जुनचौपारी गाउँपालिकाले बाढीपहिरो प्रभावितका लागि एक लाख रुपैयाँ सहयोग गर्ने भएको छ ।

स्याङ्जाका ११ स्थानीय तहमध्ये अन्य पालिकाले पनि बाढीपीडितको राहत तथा उद्धारका लागि आवश्यक सहयोग गर्ने जनाएका छन् । घोषित चार पालिकाको संस्थागत सहयोग मात्रै १६ लाख रुपैयाँ पुग्नेछ भने जनप्रतिनिधि, कर्मचारी तथा शिक्षकबाट हुने थप सहयोग यसमा जोडिनेछ ।

पालिकाहरूले बाढीमा ज्यान गुमाएकाप्रति श्रद्धाञ्जली व्यक्त गर्दै घाइतेको शीघ्र स्वास्थ्यलाभको कामना गरेका छन् । साथै प्रभावित नागरिकको उद्धार, राहत तथा पुनःस्थापनामा सहयोग गर्न सबै पक्षलाई आग्रह गरेका छन् ।