जिल्लास्तरीय पञ्चेबाजा प्रतियोगितामा जनता मा.वि. प्रथम

विश्व बाल दिवसको अवसरमा एकीकृत सेवा कार्यालय स्याङ्जाले आयोजना गरेको जिल्ला स्तरीय पञ्चेबाजा प्रतियोगितामा जनता मा.वि. कालिगण्डकी प्रथम भएको छ। भू.पू. सैनिक आवासीय माध्यमिक विद्यालय, पुतलीबजारमा भएको प्रतियोगितामा जिल्लाभरिबाट  ८ वटा पञ्चेबाजा समूह सहभागी भएका थिए।

सहभागीहरूले पञ्चेबाजाको तालमा बाल अधिकारका विषयवस्तु समेटिएका गीत र नृत्य प्रस्तुत गरेका थिए।प्रतियोगितामा द्वितीय स्थान जनहित  मा.वि. आँधिखोलाले प्राप्त गरेको थियो भने तृतीय स्थान लामागे पञ्चे बाजा समुहले प्राप्त गरेको थियो। प्रतियोगितामा  सरस्वती माध्यमिक विद्यालयले सान्त्वना स्थानमा चित्त बुझायो।प्रतियोगितामा प्रथम,द्वितीय , तृतीय र सान्त्वना स्थान प्राप्त गरेका विद्यालय/ पञ्चेबाजा समुहले नगद रू. १५ हजार, १० हजार, ७ हजार र ४ हजार , मेडल र प्रमाणपत्र प्राप्त गरेका थिए।

प्रतियोगितामा आदर्श सोनामले  उत्कृष्ट सहनाइ बादकको पुरस्कार हात पार्नुभयो भने उत्कृष्ट ढोलकी बादकको पुरस्कार  राहुल परियारले प्राप्त गर्नुभयो। यसैगरी कुशल  परियारले प्रोत्साहन पुरस्कार प्राप्त गर्नुभएको थियो।प्रतियोगिताकै दौरान स्याङ्जाली लोक गायक लोकनाथ सापकोटाले आइ लभ यु स्याङ्जा लगायतका  आफ्ना उत्कृष्ट गीतहरू प्रस्तुत गर्नु गर्नुभएको थियो।

कार्यक्रमका प्रमुख अतिथी गण्डकी प्रदेश सभा सदस्य सुधिर कुमार पौडेलले जेनजीका नाममा समाजमा अराजकता र असुरक्षा बढ्दै गएकाले बालबालिकाको अधिकारमा समेत नकारात्मक प्रभाव पर्न थालेको बताउनुभयो । सबै नागरिक जिम्मेवार भएर समाजमा स्वतन्त्रता, शान्ति र स्थायित्वका लागि लागि परेमा बाल अधिकारको संरक्षण हुने उहाँले बताउनुभयो। पञ्चेबाजा प्रतियोगिताले बालबालिकाको मौलिक संस्कृतिप्रतिको रुचि बढाउने र संस्कृति संरक्षणमा समेत टेवा पुर्‍याउने विश्वास उहाँले व्यक्त गर्नुभयो।

एकीकृत सेवा कार्यालयका प्रमुख जीवन पौडेलले संस्कृतिको पुस्तान्तरण, संरक्षण र विद्यार्थी प्रतिभा प्रस्फुटन गर्न पञ्चेबाजा प्रतियोगिता आयोजना गरिएको बताउनुभयो।बाल संजाल ,स्याङ्जाका अध्यक्ष सुजाता पौडेलले बालबालिकाको अधिकार क्षमता र पहिचान गर्न पञ्चेबाजा प्रतियोगिताले सघाउ पुर्‍याएको बताउनुभयो। राजनीतिक नेतृत्व र सरकारी निकायहरूले बालबालिकाको आवाज सुने भोलिको नेपाल सुन्दर हुने उहाँको भनाई छ। जिल्लास्तरमा हुने पञ्चेबाजा प्रतियोगिता जस्ता अतिरिक्त क्रियाकलापले  समावेशी र बालमैत्री समाज निर्माणमा सघाउ पुर्‍याउने विश्वास उहाँले व्यक्त गर्नुभयो।

प्रतियोगितामा पुतलीबजारका २ वटा समुहले भाग लिएका थिए। पुतलीबजारबाट  सरस्वती माध्यमिक विद्यालय, नाँगडाडाँ र  लामागे बाजा समूहले भाग लिएका थिए ।

यसैगरी कालिगण्डकी गाउँपालिकाबाट  जनता माध्यमिक विद्यालय, गल्याङ नगरपालिकाबाट  नेपाल राष्ट्र माध्यमिक विद्यालय, भीरकोट नगरपालिकाबाट   भाग्योदय माध्यमिक विद्यालय, आँधीखोला गाउँपालिकाबाट जनहित माध्यमिक विद्यालय, त्रि-शहिद नमुना माध्यमिक विद्यालय र प्रधुम्न पनेरु माध्यमिक विद्यालयले भाग लिएका थिए।

प्रतियोगितामा राष्ट्रिय संगितकर्मी संघका जिल्ला अध्यक्ष बुद्धि बहादुर परियार, पञ्चेबाजा विज्ञ एवं संगीतकर्मी रेशम दर्जी र पुतलीबजार प्रज्ञाप्रतिष्ठानका सदस्य रामचन्द्र परियारले निर्णायकको जिम्मेवारी सम्हालुभएको थियो।