नवग्रह मन्दिरमा  विशेष पूजा र भजन प्रतियोगिता 

स्याङ्जाको अर्जुनचौपारी गाउँपालिकामा रहेको नेपालकै पहिलो नवग्रह मन्दिरमा महाशिवरात्री विशेष पूजा र अन्तर  विद्यालय स्तरीय भजन प्रतियोगिता सम्पन्न भएको छ ।

नवग्रह मन्दिरमा  आइतबार दिउँसो महाशिवरात्री विशेष पूजाका साथै राष्ट्रिय  कलाकार पशुपति शर्मा र घनश्याम रिजालसहितका कलाकारको भजन कन्सर्ट  प्रस्तुती रहेको थियो भने शिव ताण्डव डिजे साँझ सहित ९ लाख ९९ हजार ९ सय ९९ दिप प्रज्वलन गरिएको मन्दिर व्यवस्थापन समितिले जनाएको छ । 

यस्तै पालिकाले आयोजना गरेको अन्तर विद्यालयस्तरीय भजन प्रतियोगितामा रामनदी गुरुकुलले प्रथम स्थान हासिल गरेको छ। यसैगरी अमरज्योति मावि लामडाँडाले दोस्रो स्थान र अर्जुनचौपारी चिल्ड्रेन एकेडेमीले तृतीय स्थान प्राप्त गरेका छन्। प्रतियोगितामा   प्रथम,द्वितीय र तृतीय स्थान प्राप्त गरेका विद्यालयहरूले क्रमशः नगद रु. २५ हजार, १५ हजार  र तेस्रो हुनेले रु १०हजार नगद पुरस्कार प्राप्त गरे। 

युवा तथा बालबालिकालाई समेत अध्यात्मतर्फ अग्रसर गराई समाज सुधारमा सकारात्मक प्रभाव बढाउने उद्देश्यले  कार्यक्रम आयोजना गरिएको अर्जुनचौपारी गाउँपालिका अध्यक्ष प्रकाश तिवारीले जानकारी दिनुभयो। आपसी सद्भाव, भातृत्व, संस्कृतिको संरक्षण तथा आध्यात्मिक जागरणमा यो उत्सव महत्त्वपूर्ण बन्ने उहाँको विश्वास  छ।  महाशिवरात्रीको अवसरमा हजारौं भक्तजनले नवग्रह मन्दिरको दर्शन तथा पूजाआजा गरेका थिए।