एमालले बनायो गैह्रेको नेतृत्वमा १५०१ सदस्यीय  निर्वाचन परिचालन कमिटि

नेकपा (एमाले) स्याङ्जाले आगामी फागुन २१ गते हुने प्रतिनिधिसभा निर्वाचन लक्षित निर्वाचन परिचालन कमिटि बनाएको छ । बिहीबार बसेको पार्टी जिल्ला कमिटिको बैठक तथा अभिमूखिकरण कार्यक्रममा पार्टीका जिल्ला अध्यक्ष सूर्यप्रसाद गैरे (पारस) को संयोजकत्वमा १५०१ सदस्यीय निर्वाचन परिचालन कमिटि गठन गर्ने निर्णय गरेको हो ।

परिचालन कमिटिमा जिल्ला कमिटि, जिल्ला सल्लाहकार कमिटि, निर्वाचन क्षेत्रीय समन्वय कमिटिका, पालिका कमिटि, जनप्रतिनिधि, जनसंगठनका केन्द्रीय सदस्य, प्रदेश पदाधिकारी तथा सदस्य, जिल्लाका पदाधिकारी र वडा कमिटिका सबै पदाधिकारी रहने जनाइएको छ ।

साथै, बिहीबारको बैठकले पार्टीकी केन्द्रीय सदस्य सिमाकुमारी क्षेत्रीको संयोजकत्वमा निर्वाचन परिचालन हाइकमाण्ड, चक्रबहादुर पराजुलीको नेतृत्वमा जिल्ला अनुगमन तथा मूल्यांकन समिति र प्रदेश कमिटि सचिवालय सदस्य सुधिर पौडेलको नेतृत्वमा प्रशासनिक सहजीकरण तथा समन्वय समिति गठन गर्ने निर्णय गरेको छ । त्यस्तै, बिहीबारकै बैठकले खड्कराज सुवेदीको नेतृत्वमा स्थानीय जनप्रतिनिधि समन्वय समिति पनि गठन गरेको छ ।

बिहीबार सम्पन्न पार्टीको बैठक तथा अभिमूखिकरण कार्यक्रम जिल्ला पार्टी अध्यक्ष सूर्यप्रसाद गैरेको अध्यक्षता, पार्टी केन्द्रीय सचिव पद्माकुमारी अर्यालको प्रमुख आतिथ्यता र पार्टी जिल्ला सचिव रामचन्द्र भट्टराईको सञ्चालनमा भएको थियो । 

कार्यक्रममा पार्टी केन्द्रीय सचिव पद्माकुमारी अर्याल, निर्वाचन क्षेत्र नम्बर १ का उम्मेदवार मिनप्रसाद गुरुङ, निर्वाचन क्षेत्र नम्बर २ का उम्मेदवार खिमबहादुर थापा र पार्टीका नेता तथा नेतृहरू सुधिर पौडेल, रामबहादुर थापा, नारायण मरासिनी, सिता सुन्दास, सिमा क्षेत्री लगायतले आफ्नो भनाइ राखेका थिए ।