रास्वपाको  प्रथम भीरकोट नगर अधिवेशन सम्पन्न , सभापतिमा के.सी. निर्वाचित

राष्ट्रिय स्वतन्त्र पार्टी (रास्वपा) को  प्रथम भीरकोट   नगर अधिवेशन शुक्रबार सम्पन्न भएको छ। क्षेत्री समाज भवनमा भएको अधिवेशनबाट  मीन बहादुर के.सी.  सभापतिमा सर्वसम्मत निर्वाचित  हुनुभएको छ। अधिवेशनबाट  १५ सदस्यीय नगर समिति  गठन भएको नवनिर्वाचित पार्टी सभापति   के.सी. ले जानकारी दिनुभयो। 

अधिवेशनबाट  उपसभापतिमा वसन्त अर्याल, सचिवमा गोबिन्द अर्याल र सह–सचिवमा सपना एस.के.  रूचालले जिम्मेवारी पाउनुभएको छ। सदस्यहरूमा पुष्पा अधिकारी, सुमन सारू, राजेन्द्र अर्याल, सुमित्रा थापा, गंगा हिताङ, तेज बहादुर गोदार, भिम बहादुर  बि.क. , पवित्रा खड्का र शालिकराम के.सी चयन हुनुभएको छ। मनोनीत सदस्यहरूमा चन्द्र बहादुर बि.क. र बोधराज महत हुनुहुन्छ।

अधिवेशनमा संघीय सांसद झविलाल डुम्रे  र डा. धनञ्जय रेग्मीको विशेष उपस्थिति रहेको थियो। कार्यक्रममा पार्टी संगठन सुदृढीकरण, आगामी राजनीतिक रणनीति तथा स्थानीय तहमा जनसहभागिता बढाउने विषयमा छलफल गरिएको थियो।

कार्यक्रममा सहभागी वक्ताहरूले राष्ट्रिय स्वतन्त्र पार्टीलाई जनताको आशा र भरोसाको शक्तिका रूपमा अगाडि बढाउनुपर्ने धारणा व्यक्त गरेका थिए। अधिवेशन सौहार्दपूर्ण वातावरणमा सम्पन्न भएको आयोजकले जनाएको छ।