महिलाहरूलाई सकारात्मक सोच सम्बन्धि अभिमुखीकरण

भीरकोट नगरपालिकाको आयोजनामा सकारात्मक सोच सम्बन्धि १ दिने अभिमुखीकरण कार्यक्रम    सिटि हलमा  सम्पन्न भएको छ । उममेयरसँग महिला कार्यक्रम अन्तर्गत  समाजमा सकारात्मक सोच र चेतनाको अभिवृद्धि गर्न  अभिमुखीकरण कार्यक्रम आयोजना गरिएको नगर उपप्रमुख भगवती रेग्मी अर्यालले जानकारी दिनुभयो l

कार्यक्रममा गोविन्द कुमार कर्माचार्यले    सरल र सुखी जीवनका लागी सकारात्मक सोचको खाँचो रहेको बताउनुभयो । साथै पछिल्लो केही समय यता विकृति विसंगति बढ्दो रहेकाले यसको न्यूनिकरणका लागी हरेक मानिसमा सकारात्मक सोच हुन जरुरी रहेको कर्माचार्यले  बताउनुभयो । नगर उप प्रमुखले भन्नुभयो, "सकारात्मक सोच  कुनै पनि परिस्थितिलाई सकारात्मक दृष्टिकोणले हेर्नु हो। यो सोचाइले जीवनलाई सरल, शान्त र सुखमय बनाउन मद्दत गर्छ ,तनाव कम हुन्छ,स्वास्थ्य राम्रो हुन्छ, सकारात्मक सोचले आपसी समझदारी र प्रेम बढाउँछ l"

कार्यक्रममा  प्रमुख प्रशासकीय  अधिकृत उदय बाहादुर पराजुली  र ८ न. का वडा अध्यक्ष  नन्दलाल खनालले सकारात्मक सोचका विषयमा संक्षिप्त मन्तव्य राख्नुभएको थियो l कार्यक्रममा सहभागीहरूलाई  प्रशिक्षक राजु घलेले प्रशिक्षण दिनुभएको थियो l  कार्यक्रममा जनप्रतिनिधिहरु, विद्यालयका शिक्षकहरु, टोल विकास समितिका प्रतिनिधिहरु, आमा समूह तथा संघ संस्थाका प्रतिनिधिहरु सहित ४०० जनाकाे उपस्थिति थियो ।