विद्यालय दिवा खाजामा कोदोको परिकार अनिवार्य 

फेदीखोला गाउँपालिकाले पालिका भित्रका सम्पूर्ण विद्यालयहरूमा हप्तामा कम्तीमा दुई दिन कोदोबाट निर्मित परिकारहरू दिवा खाजामा अनिवार्य गरेको छ ।     प्रथम राष्ट्रिय कोदो दिवस २०८२ साउन १६ गतेबाट विद्यालयमा लागुहुने गरेर कोदोको ढिँडो, मम, तावा रोटी, पुवा,सेलरोटी चिउरा, हलुवा , सूप आदि अनिवार्य रूपमा विद्यालयमा दिवा खाजामा रूपमा खान पर्ने पालिकाले नीतिगत निर्णय गरेको हो ।

गाउँपालिका अध्यक्ष घनश्याम सुवेदीले गाउँपालिका भित्रका सबै सार्वजनिक निकायहरू वडा कार्यालय, चमेना गृह तथा सभा–सेमिनार स्थलहरूमा कोदोबाट बनेका परिकारहरूलाई प्राथमिकता दिई अनिवार्य रूपमा प्रयोग गर्ने निर्णय गरेको बताउनुभयो । गाउँपालिकाले स्थानीय उत्पादन कोदोलाई बहुपयोगी, पोषणयुक्त तथा आर्थिक रूपमा सम्भावनायुक्त खाद्यान्नको रूपमा प्रवर्धन गर्ने उद्देश्यले प्रथम राष्ट्रिय कोदो दिवस २०८२ मा विविध कार्यक्रमहरू गर्ने तयारी गरेको हो ।

कोदोको पोषण मूल्य, खाद्य सुरक्षा, कृषक आम्दानी तथा स्थानीय अर्थतन्त्रमा यसको योगदानलाई मध्यनजर गर्दै पालिकाले नीतिगत निर्णयहरू समेत गरेको सुवेदीले बताउनुभयो । पालिकाले साउन १६ गते फेदीखोला गाउँपालिका–१, रामकोटमा कोदो रोप्ने र कोदोबाट उत्पादित विभिन्न परिकारहरूको प्रदर्शनी र उपयोग मार्फत यसको बहुउपयोगी पक्ष प्रस्तुत गर्दै समुदायमा चेतना अभिवृद्धिको अभियान सञ्चालन गर्ने सुवेदीले बताउनुभयो । गाउँपालिकाले २०७७ सालदेखि कक्षा ६ को स्थानीय पाठ्यक्रम “हाम्रो फेदीखोला” मा “कोदोः बहुपयोगी खाद्यान्न” शीर्षक समावेश गरी विद्यार्थीहरूलाई यसबारे सचेत गराउँदै आएको थियो । 

कोदाको उपयोगबाट रगतमा क्लोलेस्ट्रोलको मात्रा घट्ने, यसमा फलाम प्रचुर मात्रामा हुने हुदाँ रक्तअल्पता हुनबाट जोगाउने, बालवालिकाको हाड र दाँतको विकासमा सहयोग गर्ने, मिथियोनिन र फल्फरयुक्त एमोन एसिड जस्ता सुन्तलित एमिनो एसिड पाईने र कब्जियत हुन नदिई पेट सफा गराउने भएकाले कोदोलाई बहुउपयोगी एवं बहुगुणी खाध्यन्नको रूपमा लिइन्छ। कोदोमा चामल र मकैमा भन्दा ३५ गुणा र गहुँमा भन्दा ८.७ गुणा बढी क्यालिसियम पाइन्छ। गहुँमा भन्दा १.५ चामलमा भन्दा २.३ र मकैमा भन्दा ३.७ गुणा बढी फलाम पाईन्छ। बालबालिका, गर्भवति महिला, मधुमेह र उच्च रक्तचापको बिरामिलाई फाईदा पुग्ने अनुसन्धानबाट पत्ता लागेको छ।

गाउँपालिकाले स्थानीय उत्पादन कोदोलाई बहुपयोगी, पोषणयुक्त भएकाले कोदोको  परिकारहरूको उपयोग गर्न फेदिखोलाबासी नागरिकहरूलाई विशेष अनुरोध समेत गरेको छ।