स्थानीय तह संस्थागत क्षमता स्वमूल्याङ्कनमा अर्जुनचौपारी उत्कृष्ट 

स्याङ्जाको अर्जुनचौपारी गाउँपालिका  संघीय मामिला तथा सामान्य प्रशासन मन्त्रालयद्वारा प्रकाशित  स्थानीय तह संस्थागत क्षमता स्वमूल्याङ्कन (लिजा) मा आ.व. २०८०/८१ मा उत्कृष्ट ६ स्थानीय तहमा पर्न सफल भएको छ। अर्जुनचौपारी गाउँपालिका, स्याङ्जा  , खैरहनी नगरपालिका , चितवन, तिलोत्तमा  नगरपालिका , रूपन्देही,  निलकण्ठ नगरपालिका र बेनीघाट रोराङ्ग गाउँपालिका  , धादिङ,  रूरू गाउँपालिका, गुल्मी उत्कृष्ट स्थानीय  तह बन्न सफल भएका हुन्।

शासकीय प्रवन्ध, संगठन तथा प्रशासन,  वार्षिक बजेट तथा योजना व्यवस्थापन , सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद् व्यवस्थापन, सहकार्य र समन्वयका क्षेत्रमा  गरिएको मूल्याङ्कनमा अर्जुनचौपारीले उच्चतम अंक ल्याउँदै देशकै उत्कृष्ट पालिकाको स्थान हासिल गरेको हो । संघीय सरकारले आगामी भदौ ६ गते सिंहदरबारमा आयोजना गर्ने “सम्मान तथा स्थानीय शासन कार्यसम्पादन मूल्याङ्कन प्रणाली” शुभारम्भ कार्यक्रममा अर्जुनचौपारी लगायतका उत्कृष्ट स्थानीय तहहरूलाई मन्त्रीस्तरीय सम्मान प्रदान गर्ने भएको छ ।

केही वर्षअघिसम्म पूर्वाधार र सेवाप्रवाहमा कमजोर ठानिएको अर्जुनचौपारी गाउँपालिका अहिले देशैभर उत्कृष्ट प्रदर्शन गर्ने पालिकामा रुपान्तरण भएको छ । यस परिवर्तनको श्रेय गाउँपालिकाका अध्यक्ष प्रकाश तिवारीको नेतृत्वलाई दिइन्छ ।

पदभार सम्हाल्दै उहाँले पारदर्शी प्रशासन, युवा सहभागिता, डिजिटल प्रविधिको प्रयोग, नवप्रवर्तन र समावेशी योजनालाई प्राथमिकतामा राख्दै आउनुभएको छ। यसले पालिकाको समग्र व्यवस्थापन क्षमतामा गुणात्मक सुधार ल्याएको छ । हालै अनलाइनखबरले सार्वजनिक गरेको ‘४० प्रभावशाली युवा’ को सूचीमा अध्यक्ष तिवारीको नाम समावेश हुनुले उनको नेतृत्व क्षमता र राष्ट्रिय प्रभावलाई थप पुष्टि गरेको छ ।