संस्थागत क्षमता स्वमूल्याङ्कनमा  भीरकोट गण्डकी प्रदेशमा दोस्रो

स्थानीय तह संस्थागत क्षमता स्वमूल्याङ्कन (लिजा) मा  स्याङ्जाको भीरकोट नगरपालिका गण्डकी प्रदेशमा दोस्रो भएको छ। ८८.२५ प्रतिशत अंक सहित भीरकोट नगरपालिका द्वितीय भएको हो। अर्जुनचौपारी गाउँपालिका गण्डकी प्रदेशकै पहिलो भएको छ । आर्थिक वर्ष २०८०/०८१ को मूल्याङ्कनमा अर्जुनचौपारीले उत्कृष्ट अंक सहित प्रदेशमा पहिलो स्थान पाएको हो । अर्जुनचौपारीले ८८.७५ प्रतिशत अंक पाएको छ ।

शासकीय प्रवन्ध, संगठन तथा प्रशासन,  वार्षिक बजेट तथा योजना व्यवस्थापन , सेवा प्रवाह, न्यायिक कार्यसम्पादन, भौतिक पूर्वाधार, सामाजिक समावेशीकरण, वातावरण संरक्षण तथा विपद् व्यवस्थापन, सहकार्य र समन्वयका क्षेत्रमा  गरिएको मूल्याङ्कनका आधारमा  संघीय मामिला तथा सामान्य प्रशासन मन्त्रालयले प्रकाशित गरेको नतिजा अनुसार  स्याङ्जाका  अर्जुनचौपारी गाउँपालिका र भीरकोट नगरपालिका गण्डकी प्रदेशमै उत्कृष्ट देखिएका हुन्।

गण्डकीमा  पर्वतको जलजला गाउँपालिकाले ८८ अंक सहित तेस्रो भएको छ । प्रदेशभित्रका ३ पालिकाले ८८ अंक पार गर्दा २२ पालिकाले ८५ अंक पार गरेका छन् । यस्तै, ४१ पालिकाले ८० प्रतिशत अंक कटाएका छन् ।

पोखरा महानगरपालिकाले ८३.५  प्रतिशत अकं ल्याएको छ । नगरपालिकातर्फ गोरखाको पालुङटार ८७.७५ प्रतिशत अंक सहित दोस्रो हुँदा गाउँपालिकातर्फ गोरखाकै भीमसेन थापा गाउँपालिका समान ८७.७५ प्रतिशत अंक सहित तेस्रो भएको छ । समग्र पालिकाहरुमा पालुङटार नगरपालिका  प्रदेशमा चौथो र भीमसेन थापा नगरपालिका  पाँचौ भएको छ ।