भीरकोटका सबै वडामा डिजिटल नागरिक वडा पत्र

स्याङ्जाको भीरकोट नगरपालिकाले सबै वडामा डिजिटल नागरिक वडा पत्र संचालनमा ल्याएको छ। नगरपालिकाले परम्परागत फ्लेक्स प्रिन्टमा भित्तामा झुड्याइने नागरिक वडा पत्रलाई विस्थापित गर्दै डिजिटल वडा पत्र प्रयोगमा ल्याएको हो। नगर कार्यपालिकाको कार्यालय र ९ वटै वडा कार्यालयमा डिजिटल नागरिक वडा पत्र प्रयोगमा ल्याइएको नगर प्रवक्ता दिपेन्द्र के.सी. ले जानकारी दिनुभयो।

सार्वजनिक सेवा प्रवाहलाई प्रविधिमैत्री बनाउन र जनतालाई  डिजिटल प्रविधिमा जानकार बनाउन डिजिटल नागरिक वडा पत्र संचालनमा ल्याइएको प्रवक्ता के.सी. ले बताउनुभयो।

डिजिटल वडा पत्रमा नगरपालिका र वडाबाट प्रवाह हुने सम्पुर्ण सेवा प्राप्त गर्दा आवश्यक पर्ने  कागजात र  लाग्ने दस्तुर , जनप्रतिनिधिहरू र कर्मचारीको फोटोसहितको  विवरण समावेश गरिएको छ।

नगर उपप्रमुख भगवती रेग्मी अर्यालले डिजिटल भीरकोट अवधारणा अनुरूप डिजिटल वडा पत्र प्रयोगमा ल्याइएको बताउनुभयो। करिब २० लाखको लागतमा  सफ्टवेयर हब नेपालको प्राविधिक सहयोगमा डिजिटल वडा पत्र राखिएको हो।  स्थानीय सरकार ऐन २०७४ अनुसार नागरिकको अधिकार र जिम्मेवारी सुनिश्चित गर्ने कानुनी आधार हो नागरिक वडा पत्र । यसले नागरिकलाई सेवा पाउने हक, पारदर्शिता र जवाफदेहिता सुनिश्चित गर्छ। यसमार्फत शिक्षा, स्वास्थ्य, सामाजिक सुरक्षा जस्ता आधारभूत सेवामा पहुँच सहज हुन्छ।

डिजिटल नागरिक वडा पत्रले सूचना प्रवाहलाई छरितो, पारदर्शी र द्रुत बनाउँछ। तर  जनचेतनाको अभाव र नागरिक शिक्षाको कमीका कारण करिब ५ प्रतिशत नागरिकले मात्रै डिजिटल नागरिक वडा पत्र प्रयोग गर्ने गरेको नगर उपप्रमुख भगवती रेग्मी अर्यालले बताउनुभयो।" डिजिटल नागरिक वडापत्रको प्रयोग बढाउन  जनचेतना कार्यक्रम र  नागरिक शिक्षा आवश्यक रहेको महसुस गरेका छौं , यसको प्रभावकारिता बढाउन कर्मचारी ,जनप्रतिनिधि र संचारकर्मीको भूमिका अहम् छ।" उपप्रमुख अर्यालले भन्नुभयो। 

डिजिटल नागरिक वडापत्र संचालनमा ल्याएको १ वर्षको अवधिमा समेत नगरपालिकाले नागरिकलाई वडा पत्रको प्रयोगका बारेमा उपयुक्त योजना वा कार्यक्रम नल्याउँदा वडा पत्रको अपेक्षित प्रयोग हुन सकेको छैन। भरपर्दो विद्युत सेवा नहुँदा र ब्याकअपको प्रभावकारी व्यवस्था नहुँदा चाहने र सक्ने नागरिकले समेत वडा पत्र प्रयोग गर्न पाएका छैनन् । कतिपय वडा कार्यालयमा राखिएका वडा पत्र उपयुक्त स्थानमा नराखिँदा प्रयोगमा समेत सहजता हुन सकेको छैन।