उद्यमशीलता प्रवर्द्धन गर्न अर्जुनचौपारीले  सहुलियत ब्याजदरमा कर्जा दिने

अर्जुनचौपारी गाउँपालिकाले उद्यमशीलता र स्वरोजगारीको प्रवर्द्धनका लागि उद्यमीहरूलाई सहुलियत ब्याजदरमा कर्जा उपलब्ध गराउने भएको छ। गाउँपालिकाको आर्थिक वर्ष २०८२/८३ को कार्यक्रम अनुसार स्टार्ट अप तथा नवप्रवर्तन व्यवसायका लागि वित्तीय संस्थासँगको सहकार्यमा सहुलियत ब्याजदरमा कर्जा प्रदान गर्न लागिएको हो।  गाउँपालिकाभित्र कृषि, पशुपन्छी तथा मत्स्यपालन  व्यवसाय संचालन गरिरहेका वा संचालन गर्न इच्छुक व्यक्ति, समूह तथा फर्महरुलाई सहुलियतपूर्ण व्याजदरमा कर्जाको व्यवस्था गरिने  प्रमुख प्रशासकीय अधिकृत युवराज अर्यालले जानकारी दिनुभयो। 

पालिकाले प्रदान गर्ने सहुलियत कर्जा प्राप्त गर्न व्यक्तिगत वा संस्थागत  रूपमा आवदेन दिन सकिनेछ। व्यक्तिगत रूपमा आवेदन गर्नेले नागरिकता प्रमाण पत्रको प्रतिलिपि र संस्थागत रूपमा आवेदन दिनेले व्यवसाय दर्ता प्रमाण पत्र, करचुक्ता प्रमाण पत्रका साथमा व्यवसाय योजना , सम्बन्धित वडा कार्यालयको सिफारिस पत्रसहित गाउँपालिकामा आवेदन पेश गर्नुपर्ने प्रमुख  प्रशासकीय अधिकृत अर्यालले जानकारी दिनुभयो। गाउँपालिकाले १० दिन भित्र आवेदन पेश गर्न सार्वजनिक  सूचना मार्फत आह्वान गरेको छ।

स्टार्टअप तथा नवप्रवर्तन व्यवसाय लागि सहुलियत ब्याजदरमा कर्जा कार्यक्रम अन्तर्गत पहिलो चरणमा पालिकाले माग सङ्कलन गर्ने गाउँपालिका अध्यक्ष प्रकाश तिवारीले स्मार्ट अखबारलाई बताउनुभयो।  अध्यक्ष तिवारीका अनुसार माग सङ्कलन गर्दा पालिकाले उत्पादनमुखी व्यवसायहरू तथा नवप्रवर्तन व्यवसायहरूलाई वित्तीय संस्था मार्फत न्यूनतम ब्याजदरमा कर्जा दिलाई सोमा लाग्ने ब्याजको ५०% अनुदान पालिकाले दिनेछ। 

वित्तीय संस्था छनौटको लागि पालिकाले सूचना प्रसार गरिसकेको छ।  पालिकाले न्यूनतम ब्याजदर, कर्जा अवधि तथा कर्जा सीमाको आधारमा वित्तीय संस्था छनौट गर्नेछ । उक्त कार्यक्रमको लागि हाल ५०  लाख कर्जाको लागि ब्याज अनुदान उपलब्ध गराउन  बजेट विनियोजन गरिएको अध्यक्ष तिवारीले जानकारी दिनुभयो। छनोट भएका उद्यमीहरूलाई सहुलियत कर्जा व्यवसायिक योजनाका आधारमा विना धितो उपलब्ध  उपलब्ध गराइने उहाँले बताउनुभयो । उद्यमीहरूलाई प्रोत्साहित गर्न उक्त कर्जाको   जमानी पालिकाले लिने बताइएको छ।