मुक्तिनाथ विकास बैंकद्वारा विद्यार्थीलाई न्यानो कपडा वितरण

स्याङ्जाको पुतलीबजार नगरपालिका –५ पौवैगौंडेस्थित सितला माध्यमिक विद्यालयका विद्यार्थीलाई मुक्तिनाथ विकास बैंकले न्यानो कपडा वितरण गरेको छ । मुक्तिनाथ विकास बैंकले सामाजिक उत्तरदायित्व अन्तर्गत विद्यालयमा अध्ययनरत १ सय ४५ विद्यार्थीलाई न्यानो कपडा वितरण गरेको हो । बैंकले १ लाख ५० हजार रुपैयाँ बराबरको न्यानो कपडा हस्तान्तरण गर्दै विद्यार्थीको स्वास्थ्य र पढाइमैत्री वातावरणलाई सहयोग पुगोस भन्ने उद्देश्य राखेको बैंकका सञ्चालक भरतप्रसाद लम्सालले जानकारी दिनुभयो।

लम्सालका अनुसार “बैंक बढ्न समाजको भूमिकासँगै समाज माथि उठ्न बैंकको सहकार्य जरुरी हुन्छ,” भन्दै बैंकले नाफाभन्दा बाहिर निस्केर समाजका जेहेन्दार र मेहनती वर्गलाई साथ दिँदै आएको उल्लेख गर्नुभयो ।

मुक्तिनाथ विकास बैंक उप–क्षेत्रीय कार्यालयका प्रमुख ऋषि ढकालले सेवा विस्तारसँगै सामाजिक उत्तरदायित्वमा पनि बैंक उत्तिकै केन्द्रित रहेको बताउनुभयो। “समाजका हरेक समूहसँग हातेमालो गर्दै अघि बढ्नु नै हाम्रो प्राथमिकता हो,” उहाँले  भन्नुभयो ।

२०६३ सालमा स्याङ्जाबाट कारोबार सुरु गरेको बैंक अहिले नौ अर्बभन्दा बढी चुक्तापुँजीसहित वाणिज्य बैंकतर्फ उक्लने तयारीमा छ । छोटो समयमै राष्ट्रिय स्तरमा विश्वसनीयता बनाएको बैंकले स्थानीय क्षेत्रमा निरन्तर सामाजिक कार्यक्रम सञ्चालन गर्दै आएको छ ।

यस्तै, विद्यालयका पूर्वविद्यार्थी मञ्चको पहलमा १० हजार रुपैयाँ बराबरका खेलकुद सामग्री पनि विद्यालयमार्फत विद्यार्थीलाई हस्तान्तरण गरिएको विद्यालयले जनाएको छ ।