वडा अध्यक्ष सुटुक्क अमेरिका, दुई वर्षदेखि कार्यवाहककै भरमा वडा

स्याङ्जाको पुतलीबजार नगरपालिका -४ का वडा अध्यक्ष शिव बहादुर थापा २०८० भदौ १५ गते स्वास्थ्य उपचारका लागि अन्यत्र देशमा जाने बताउँदै वडा सदस्य लिलावती पौडेललाई कार्यवाहकको जिम्मेवारी दिएर हराउनु भएको छ । वडा अध्यक्ष थापा दुई वर्ष बित्दासमेत फर्किनुभएको  छैन् ।

महिला वडा सदस्य लिलावती पौडेलले सुरुमा उपचारका लागि बाहिर जाने कारण बताइएकोले २०८० भदौ १५ गतेदेखि कार्यवाहक सम्हाल्नुभयो। तर केही दिनमै थापा अमेरिका पुगेको खबर आयो । “स्वास्थ्य उपचारका लागि बाहिर जानुपर्ने भएकाले वडा अध्यक्षको जिम्मेवारी मलाई दिनुभयो,” पौडेलले भन्नुभयो, “तर केही समयपछि गाउँमै अमेरिका पुगेको हल्ला चल्यो ।” पौडेलले अधिकांश जिम्मेवारी आफ्नै काँधमा परेको र नबुझेका विषय पनि आइरहेको बताउँदै यसबारे कानुनी सल्लाहकारसँग बुझ्दा वडा अध्यक्षजस्तो अधिकार नहुने भन्ने बताउनुभयो।

पौडेलले भन्नुभयो, “कार्यवाहकलाई पनि अर्को कार्यवाहक दिनुपर्ने स्थिति पर्नु रमाइलो होइन रहेछ । कहिलेकाहीँ व्यक्तिगत वा घरायसी कारणले केही समय बस्नुपरे पनि जनताको काम रोकिएला कि भन्ने चिन्ता बढ्छ । त्यसमाथि म त वडा नै कहिल्यै छोडेर गएको पनि छैन ।”

थापा वडा सदस्य लिलावती पौडेललाई कार्यवाहक वडा अध्यक्ष भई दैनिक कार्यसम्पादन गर्न अधिकार प्रत्यायोजन गरेलगत्तै पालिकाको नियमित कामकाजमा अनुपस्थित हुनुहुन्छ । यस विषयमा नगरपालिका प्रमुख तुलसीराम रेग्मीले वडा थापा कहाँ हुनुहुन्छ भन्ने  विषयमा आफूलाई समेत जानकारी नभएको बताउनुहुन्छ। 

तर, थापा अमेरिका पुगेपछि पनि उहाँको नेपालस्थित बैंक खातामा सेवासुविधा जम्मा भएको तथ्य बाहिर आएको छ । नगरपालिकाले २०८० भदौदेखि २०८१ असार महिनासम्मको अवधिभित्र यातायात, पत्रपत्रिका, मोबाइल रिचार्ज, अतिथि सत्कार, समन्वय सहजीकरण, बैठक तथा अनुगमन लगायतमा कूल २ लाख ७६ हजार १९० रुपैयाँ भुक्तानी गरेको हो ।

पुतलीबजारका प्रमुख प्रशासकीय अधिकृत धर्मराज ढुङ्गानाले आफू कार्यालयमा हाजिर हुन आएसङ्गै वडा अध्यक्ष थापा नगरको सम्पर्कमा नरहेको थाहा पाएपछि २०८१ साउनदेखि नै उनको सेवासुविधा रोकिएको जानकारी दिनुभयो । वडा अध्यक्ष थापाको खातामा यसअघि गएको रकम महालेखाले बेरुजु देखाएपछि पालिकाको खातामा फिर्ता आएको प्रमुख प्रशासकीय ढुङ्गानाले बताउनुभयो । ढुङ्गाना २०८१ असोज २१ गतेदेखि कार्यालय प्रमुखको जिम्मेवारीमा हुनुहुन्छ । 

थापा नेपाली काङ्ग्रेसबाट वडा अध्यक्षमा निर्वाचित हुनुभएको  थियो। नेपाली काङ्ग्रेसका नगर सभापति सुरज कुमार अधिकारीले थापाले पार्टीलाई कुनै पनि जानकारी नदिई अमेरिका गएको बताउनुभयो । उहाँका अनुसार, थापा हालसम्म पनि पार्टिको सम्पर्कमा आउनुभएको छैन । नगर सभापति अधिकारीले थापा पार्टीको नगर समितीको कुनै औपचारिक पदमा नरहेको बताउनुभयो ।