महेन्द्र ज्योतिका ९३ विद्यार्थीहरुलाई विद्यालय पोशाक वितरण

महेन्द्र ज्योती माध्यमिक विद्यालयमा अध्ययनरत ९३ जना  विद्यार्थीहरुलाई विद्यालय पोशाक वितरण गरिएको छ । खुमा अर्याल फाउण्डेसनले  विद्यालयमा अध्ययनरत सबै   विद्यार्थीहरुलाई ट्रयाक सुट वितरण गरेको हो । 

भीरकोट नगरपालिका वडा न ७ मा प्रधान कार्यालय रहेको फाउण्डेसनले सोही वडाको  गरिब तथा विपन्न वर्गका विद्यार्थीहरुले अध्ययन गर्दै आएको  महेन्द्र ज्योति माध्यमिक विद्यालयका विद्यार्थीहरूलाई पोशाक वितरण गरेको हो। वडाको माग अनुसार पोशाक वितरण गरिएको फाउन्डेसनका अध्यक्ष लेखनाथ शर्माले जानकारी दिनुभयो । 

कार्यक्रममा भीरकोट नगरपालिकाका नगर प्रमुख गोविन्द कुमार कर्माचार्यले शिक्षा र स्वास्थ्यमा विभिन्न कार्यक्रमहरु गरिरहेको फाउन्डेसनले जाडो समयमा विद्यार्थीलाई न्यानो पोशाक  वितरण गरेकोमा धन्यवाद व्यक्त गर्नुभयो । उहाँले सभ्य नागरिकको पहिलो पहिचान नै असल शिक्षा भएकाले शिक्षामा राज्यले गरेको लगानीलाई आत्मसाथ गर्दै गुणस्तरीय शिक्षाका लागि सरोकारवाला सबैले ध्यान दिनुपर्ने बताउनुभयो। 

कार्यक्रममा नगर उपप्रमुख भगवती रेग्मी अर्यालले मानवीय र सामाजिक कार्यमा फाउन्डेसनको सक्रियता  प्रसंशनीय रहेको बताउनुभयो । कार्यक्रममा बोल्दै खुमा अर्याल फाउण्डेसनका संस्थापक एवम् वरिष्ठ उद्यमी खुमा प्रसाद अर्यालले सबैको साथ र सहयोग र समन्वयले सामाजिक कार्यमा लाग्ने प्रेरणा मिलिरहेको बताउनुभयो।  कार्यक्रममा विद्यालयका नवनियुक्त प्रधानाध्यापक उदय शर्मा लामिछानेले र  वडा अध्यक्ष तारा अर्यालले फाउण्डेसनको सामाजिक कार्यको प्रशंसा गर्दै धन्यवाद व्यक्त गर्नुभएको थियो।