आन्तरिक तथा बाह्य पर्यटन प्रवर्धनका लागि दौड प्रतियोगिता

सात सय कोल्मा बहाकोट सम्पर्क मञ्च स्याङ्जाले आयोजना गरेको छैटौं क्रसकन्ट्री दौड प्रतियोगितामा पाँच सय खेलाडी सहभागी हुने भएका छन् ।

आन्तरिक तथा बाह्य पर्यटन प्रवर्धनमा टेवा पुर्‍याउने उद्देश्यले आगामी पुस ८ गते पुतलीबजार नगरपालिका –९ कोल्मा बहाकोटमा प्रतियोगितामा आयोजना गरिएको पत्रकार सम्मेलनमा सो जानाकारी गराइएको हो ।

प्रतियोगितामा २५ किमी (२१ वर्ष माथि) खुला, १० किमी महिला, १० किमी (२१ वर्षमुनि) पुरुष, पाँच किमी विद्यालय स्तरीय छात्र तथा छात्रा र लुङ्गी ड्रेसमा ३० वर्ष माथिका महिला(रन फर फन) गरी छ विधामा प्रतिस्पर्धा हुने मञ्चका अध्यक्ष मेजर सुवेदार दुतप्रसाद गुरुङले बताउनुभयो ।

२५ किमि खुलातर्फ प्रथमले ५० हजार, दोस्रोले ४० हजार र  तेस्रोले १० हजार रुपियाँ, महिला तथा २१ वर्ष मुनितर्फ प्रथमले २०, दोस्रोले १५ र तेस्रोले १० हजार तथा विद्यार्थी समूहमा छात्र तथा छात्रा दुवैतर्फ प्रथमले आठ, द्वितीयले पाँच र तृतीयले तीन हजार रुपियाँसहित ट्रफी, मेडल र प्रमाणपत्र प्राप्त गर्ने छन् ।

यस्तै रन फर फनतर्फ प्रथमले पाँच, द्वितीयले तीन र तृतीयले दुई हजार प्राप्त गर्ने छन् । सात सय कोल्मा बहाकोट क्षेत्र भित्रका एकजनालाई पाँच हजार रुपियाँसहित मेडल र प्रमाणपत्र प्रदान गर्ने छन्।

दौड कोल्मा बराहचौरबाट सतीडाँडा, काउले, डाँडास्वाँरा, नाम्चे, काल्खु हुँदै तनहुँको खल्लुबोट, राइपुर, बिसौना, बंगालेखोला, सिम्लेस्वाँरा, ओडारे, खुदी, मडकिना भन्ज्याङ हुँदै पुनः बराहचौर फर्किनेछ ।

प्रतियोगितामा यो पटक विदेशीसहित पाँच सय खेलाडी सहभागिता हुने अपेक्षा गरिएको भने १२ लाख ८१  हजार रुपियाँ खर्च हुने अनुमान गरिएको महासचिव जीवन पोखरेलले जानकारी दिनुभयो ।

सात सय कोल्मा बाहकोट सम्पर्क मञ्चको स्थापना गरी सोही मञ्च मार्फत खेलकुद र पर्यटनको माध्यमबाट ग्रामीण क्षेत्रको विकास, कला संस्कृतिको पहिचान, खेलकुद तथा पर्यटनमार्फत गाउँलाई विश्वभर चिनाउने सहित ‘गाउँबाट बिदेशीएकालाई जोड्ने’ अभियान सुरु गरिएको हो ।