पुतलीबजार नगरपालिकामा बुधबार शोक बिदा

स्याङ्जाको पुतलीबजार नगरपालिकाले बुधबार शोक बिदा दिने निर्णय गरेको छ। नगरपालिकाको सरसफाइ केन्द्रमा कार्यरत कर्मचारी गीता शुवाको निधनमा दुःख व्यक्त गर्दै नगरपालिकाले बुधबार नगर क्षेत्रभर शोक बिदा दिने निर्णय गरेको हो।

नगर प्रमुख तुलसीराम रेग्मीले एक सूचना जारी गर्दै कर्मचारी शुवाको निधनमा बुधबार पुतलीबजार नगरपालिका अन्तर्गतका सम्पूर्ण वडा कार्यालयहरू, स्वास्थ्य संस्था तथा शिक्षण संस्थाहरूमा शोक बिदा दिइने जानकारी गराउनुभएको छ। बिदाको दिन नियमित सेवा प्रवाह बन्द रहने भए पनि अत्यावश्यक सेवाका लागि भने सम्बन्धित वडा वा स्वास्थ्य केन्द्रको सट्टा नगरपालिकाको कार्यालयमा सम्पर्क गर्न सकिने कुरा सूचनामा उल्लेख गरिएको छ।

शुवाको सोमबार कार्यालय समयमा काम गरिरहेकै अवस्थामा असामयिक निधन भएको नगरपालिकाले जनाएको छ। कर्तव्य पालनाको सिलसिलामा खटिएकै अवस्थामा भएको यो दुःखद घटनाले सिङ्गो नगरपालिका परिवार स्तब्ध र मर्माहत भएको छ। लामो समयदेखि नगरको सरसफाइ क्षेत्रमा इमानदारीपूर्वक सेवा गर्दै आउनुभएकी शुवाको निधनले नगरपालिकाले एक मेहनती र कर्तव्यनिष्ठ सदस्य गुमाएको छ।

नगरपालिकाले यो दुःखद घटनाप्रति गहिरो दुःख व्यक्त गर्दै दिवंगत आत्माको चिरशान्तिको कामना गरेको छ। साथै, शोकको यस घडीमा शोकसन्तप्त परिवारजनप्रति हार्दिक समवेदना प्रकट गर्दै धैर्यधारण गर्ने शक्ति प्राप्त होस् भन्ने कामना समेत गरिएको छ। दिवङ्गत कर्मचारीको सम्मानमा नगरपालिकाले आगामी दिनमा पनि कर्मचारीको हित र सुरक्षामा विशेष ध्यान दिने प्रतिबद्धता व्यक्त गरेको बुझिएको छ।

तस्बिर: नगरपालिका द्वारा जारी गरिएको शोक बिदा सम्बन्धी सूचना l