भीरकोट जेसीजको आठौं साधारण सभा सम्पन्न, वर्ष २०२६ को नेतृत्व गुरुङलाई

"मानवताको सेवा नै जीवनको सर्वोत्तम कार्य हो" भन्ने मूल मर्मका साथ युवाहरूको नेतृत्व तथा व्यक्तित्व विकासमा सक्रिय भीरकोट जेसीजको आठौं साधारण सभा तथा सातौं अधिवेशन सम्पन्न भएको छ। उक्त अधिवेशनले वर्ष २०२६ का लागि विजय गुरुङको अध्यक्षतामा नयाँ कार्यसमिति सर्वसम्मत रूपमा चयन गरेको छ। १८ देखि ४० वर्षसम्मका युवाहरूको नेतृत्व विकास गर्ने उद्देश्यले स्थापित यस संस्थाले छोटो समयमै आफ्नो छुट्टै पहिचान बनाउन सफल भएको छ।

अधिवेशनबाट कार्यकारिणी उपाध्यक्ष पदमा आयुष पौडेल र विनोद अधिकारी चयन हुनुभएको छ। यसैगरी कानुनी सल्लाहकारमा सिर्जना गौतम, महासचिवमा मुनाल गोदार र कोषाध्यक्षमा जगदीश अर्याल सर्वसम्मत निर्वाचित हुनुभएको छ। संस्थाको उपाध्यक्षहरूमा सन्जु केसी, प्रतीक्षा अर्याल, सुमन चापागाईं र सम्राट अधिकारी चयन हुनुभएको छ। नवनिर्वाचित अध्यक्ष गुरुङले संस्थाको गरिमालाई उच्च राख्दै युवाहरूको क्षमता विकास र सामाजिक कार्यमा समर्पित रहने प्रतिबद्धता व्यक्त गर्नुभएको छ।

अधिवेशनमा वक्ताहरूले जेसीज अभियानले युवाहरूलाई समाजसेवामा लाग्न प्रेरित गरिरहेको र स्वदेशमै अवसरको खोजी गर्न प्रोत्साहन गरेको धारणा राखेका थिए। वर्ष २०२५ का अध्यक्ष शिवप्रसाद खनालको कार्यकालपछि अब आउने वर्षका लागि गुरुङको नेतृत्वमा नयाँ टिमले जिम्मेवारी सम्हाल्ने तयारी गरेको हो। भीरकोट जेसीजले स्थापनाकालदेखि नै अनुशासन, विधि र प्रक्रियालाई पालना गर्दै समाजमा सकारात्मक परिवर्तनका लागि नेतृत्वदायी भूमिका खेल्दै आएको छ।