भाग्योदय भूतपूर्व विद्यार्थी समाजको प्रथम अधिवेशन : अध्यक्षमा खनाल

भाग्योदय भूतपूर्व विद्यार्थी समाजको प्रथम अधिवेशन सम्पन्न भएको छ। अधिवेशनबाट समाजको अध्यक्षमा ढाकाराम खनाल निर्वाचित हुनुभएको छ।आइतबार भाग्योदय मा.वि. मा सम्पन्न भएको अधिवेशनले सर्वसम्मत रूपमा ११ सदस्यीय  नयाँ कार्यसमिति चयन गरेको निर्वाचन मण्डलको संयोजक ज्ञान प्रसाद अर्यालले जानकारी दिनुभयो।

प्रथम अधिवेशनबाट उपाध्यक्षमा उज्जल रेग्मी, सचिवमा  विदुर कोइराला, सहसचिवमा कौशिला रोका थापा, कोषाध्यक्षमा  भोजबहादुर थापा निर्वाचित हुनुभएको छ। यसैगरी सदस्यहरूमा रिवन कुमार घिमिरे, सरोज अधिकारी, नारायण प्रसाद कोइराला, सरला विक, लोक बहादुर गोदार र हरिबहादुर थापा निर्वाचित हुनुभएको छ।

कार्यक्रममा विद्यालय व्यवसमितिका अध्यक्ष छायाराम खनालले पूर्व विद्यार्थीहरू वैधानिक रूपमा एकजुट भएकोमा खुशी व्यक्त गर्दै विद्यालयको शैक्षिक गुणस्तर वृद्धिमा सबैको साथ ,सहयोग आवश्यक रहेको बताउनुभयो। उहाँले विद्यालय भौतिक रूपमा सम्पन्न भएको बताउँदै शैक्षिक गुणस्तरमा समेत नमूना बनाउन पूर्व विद्यार्थीहरूले सकारात्मक वातावरण सृजना गर्नुपर्ने धारणा व्यक्त गर्नुभयो।

नवगठित भाग्योदय भूतपूर्व विद्यार्थी समाजले विद्यालयको शैक्षिक गुणस्तर वृद्धि एवं भौतिक उन्नयनमा टेवा पुर्‍याउने उद्देश्यले पूर्व विद्यार्थीहरूलाई जोड्दै आजीवन सदस्यता वितरण गरिरहेको छ। हालसम्म १ सय १७ जनाले आजीवन सदस्यता लिएको समितिका कोषाध्यक्ष भोजबहादुर थापाले जानकारी दिनुभयो।

२०३३ सालमा स्थापना भएको विद्यालयले यही माघ १२ देखि १४ गतेसम्म स्वर्ण महोत्सव मनाउँदै छ। भीरकोटमा नमूना विद्यालय विकास कार्यक्रम कार्यान्वयन गरिरहेको विद्यालयमा ४ सय ६४ जना विद्यार्थी र ३५ जना शिक्षकहरू रहेका छन्। पूर्व प्राथमिक तहदेखि १२ कक्षा सम्म अंग्रेजी र नेपाली दुबै माध्यममा पढाइ हुने यो विद्यालयमा प्राविधिक शिक्षातर्फ  १८ महिने कृषि प्राविधिक पढाइ भैरहेको छ।