पत्रकार हिमाल न्यौपाने एनटिभीबाट सम्मानित

स्याङ्जाका क्रियाशील पत्रकार हिमाल न्यौपाने काठमाडौँमा सम्मानित हुनुभएको छ। नेपाल टेलिभिजनको ४१औँ वार्षिकोत्सवका अवसरमा शनिबार आयोजित एक विशेष समारोहमा उहाँलाई ‘उत्कृष्ट जिल्ला संवाददाता’ को रूपमा सम्मान गरिएको हो।

मुलुकको पहिलो टेलिभिजन संस्थाका रूपमा परिचित नेपाल टेलिभिजनका लागि व्यावसायिक, जिम्मेवार र जवाफदेही ढङ्गले निरन्तर समाचार सम्प्रेषण गरी पुर्‍याएको योगदानको उच्च मूल्याङ्कन गर्दै न्यौपानेलाई यस वर्षको उत्कृष्ट संवाददाताका रूपमा छनोट गरिएको आयोजकले जनाएको छ।

फोटोग्राफर मञ्च स्याङ्जाका अध्यक्ष समेत रहनुभएका न्यौपाने लामो समयदेखि पत्रकारितामा सक्रिय हुनुहुन्छ। उहाँ विगत चार वर्षदेखि नेपाल टेलिभिजनको स्याङ्जा जिल्ला संवाददाताका रूपमा कार्यरत हुनुहुन्छ। वि.सं. २०६९ सालदेखि स्याङ्जाबाट पत्रकारिता यात्रा सुरु गर्नुभएका न्यौपानेले यसअघि एग्रो टाइम्स मिडिया, कृषि टेलिभिजन र ग्यालेक्सी फोर के टेलिभिजनमा काम गरी अनुभव बटुलिसक्नुभएको छ। हाल उहाँले नेपाल टेलिभिजनमार्फत स्याङ्जाका गतिविधि राष्ट्रिय दर्शकमाझ पुर्‍याउँदै आउनुभएको छ।