पोखराको हेल्दी होममा हाइड्रा फेसियल र बिसिए स्क्यानर सेवा विस्तार

पर्यटकीय राजधानी पोखरामा स्वास्थ्य र सुन्दरतालाई जोडेर ‘हेल्दी होम’ ले आफ्नो सेवा विस्तार गरेको छ। सोमबार आयोजित एक औपचारिक कार्यक्रमका बीच अत्याधुनिक प्रविधियुक्त उपकरण र सेवाहरूको घोषणा गर्दै नयाँ सेवाको शुभारम्भ गरिएको हो।

पोखराको न्युरोडमा विगत एक दशकदेखि सञ्चालनमा रहेको हेल्दी होमको क्लिनिकमा छाला रोग विशेषज्ञ डा. शर्मिला त्रिपाठीले आधुनिक उपकरणसहितको विस्तारित सेवाको उद्घाटन गर्नुभएको हो। सेवाको उद्घाटन गर्दै डा. त्रिपाठीले स्वास्थ्य र सुन्दरता समयको माग रहेको बताउँदै क्लिनिकले पोखरेलीको चाहना पूरा गर्ने विश्वास व्यक्त गर्नुभयो। काठमाडौँमा उपलब्ध बिसिए (BCA) मेसिन र हाइड्रा फेसियल जस्तो गुणस्तरीय प्रविधि पोखरामा भित्र्याएर सेवाग्राहीको मन जित्न सफल भएकोमा उहाँले खुसी व्यक्त गर्नुभयो। स्वास्थ्य र सुन्दरता एक अर्काका परिपूरक भएको बताउँदै उहाँले ‘स्किन टेस्ट’ (छाला परीक्षण) गरेर मात्र उपचार प्रक्रिया अघि बढाउन सुझाव दिनुभयो।

हेल्दी होमका प्रबन्ध निर्देशक भगवती भट्टराईका अनुसार डा. त्रिपाठीको सुझाव बमोजिम सोमबारदेखि नै छाला परीक्षणको बहिरङ्ग सेवा (OPD) सुरु गरिएको छ र यो नियमित रूपमा उपलब्ध हुनेछ। महिला उद्यमी भट्टराईले सञ्चालनमा ल्याउनुभएको यस संस्थामा हाल १० जनालाई एकैपटक सेवा दिन सकिने गरी व्यवस्थापन मिलाइएको छ।

बिसिए स्क्यानर र हाइड्रा फेसियलका विशेषता नयाँ भित्र्याइएको ‘बिसिए स्क्यानर’ (Body Composition Analyzer) ले मानव शरीरको स्क्यान गरी बोसो (Fat), पानी र रगतको मात्रा पत्ता लगाउने प्रबन्ध निर्देशक भट्टराईले जानकारी दिनुभयो। यो उपकरणले स्क्यान गरेपछि छालाको उपचार गर्न र तौल घटाउने उपचार प्रक्रियामा सहज हुने उहाँको भनाइ छ। प्रविधियुक्त उपचार पद्धतिबाट एक महिनामा ७ देखि १० किलोसम्म तौल घटाउन सकिने तथ्य सेवाग्राही स्वयंको अनुभवबाट पुष्टि भएको दाबी गरिएको छ।

त्यस्तै, हेल्दी होमले ल्याएको ‘हाइड्रा फेसियल’ ले अनुहारको छालाको चाया, पोतो, खिल र पिम्पल लगायतका समस्या समाधान गर्ने बताइएको छ। हाल ओपनिङ अफर अन्तर्गत हाइड्रा फेसियलको शुल्क ३ हजार देखि ४ हजार ५ सय रुपैयाँसम्म तोकिएको र एक पटक गरेपछि ४५ दिनसम्म यसको प्रभाव रहने जनाइएको छ।

सेवा विस्तारको योजना काठमाडौँमा मुख्यालय रहेको हेल्दी होमले उपत्यका बाहिर पोखरामा पहिलो फ्रेन्चाइज विस्तार गरेको काठमाडौँका मार्केटिङ म्यानेजर जन्सन श्रेष्ठले बताउनुभयो। हाल काठमाडौँको मध्य बानेश्वर, पुल्चोक र जमलमा शाखा सञ्चालनमा रहेको र सन् २०२६ भित्र १० वटासम्म शाखा विस्तार गर्ने योजना रहेको श्रेष्ठले जानकारी दिनुभयो।

कार्यक्रममा वरिष्ठ चिकित्सक तीर्थलाल उपाध्याय लगायतको उपस्थिति रहेको थियो भने कार्यक्रमको सञ्चालन भीम गायकले गर्नुभएको थियो।