भीरकोटमा आगलागीपीडितलाई विद्यालय, जेसिज र रेडक्रसद्वारा राहत प्रदान

मंगलबार भएको आगलागीबाट स्याङ्जाको भीरकोट नगरपालिका–७ निवासी सिं बहादुर रोकाको घर पूर्ण रूपमा जलेर नष्ट भएको छ। आगलागीका कारण घर, गोठ, कुखुरा, गरगहना, खाद्यान्न तथा लत्ताकपडा जलेर करिब १६ लाख रुपैयाँ बराबरको क्षति भएको भीरकोट–७ का वडा सदस्य देवप्रसाद अर्यालले जानकारी दिनुभयो।

पीडित परिवारलाई आपत्कालीन अवस्थामा सहयोग गर्ने उद्देश्यले विभिन्न संघसंस्थाले राहत सामग्री तथा नगद उपलब्ध गराएका छन्। बालोदय माध्यमिक विद्यालयले ५५ हजार १२५ रुपैयाँ सङ्कलन गरी पीडितलाई हस्तान्तरण गरेको छ। विद्यालय व्यवस्थापन समितिका अध्यक्ष तोयनाथ अर्याल र प्रधानाध्यापक अमृत अर्यालको नेतृत्वमा शिक्षक, विद्यार्थी र स्थानीय समुदायबाट सङ्कलन गरिएको उक्त रकम रोका परिवारलाई प्रदान गरिएको हो।

त्यसैगरी, भीरकोट जेसिजले सिरक, डसना तथा न्यानो कपडाहरू प्रदान गरेको छ। जेसिजका अध्यक्ष विजय गुरुङ, पूर्व अध्यक्ष सुन्दर कोइराला लगायतका पदाधिकारीहरूले संयुक्त रूपमा राहत सामग्री हस्तान्तरण गर्नुका साथै जेसिजको टोलीले पीडितको घर वरिपरि सरसफाइ समेत गरेको जनाएको छ।

नेपाल रेडक्रस सोसाइटीले खाद्यान्न र बन्दोबस्तीका सामान उपलब्ध गराएर आपत्कालीन सहयोग पुर्‍याएको छ भने लायन्स क्लब अफ भीरकोटले ७ फुटे १५ पाता रङ्गिन टिन (जस्तापाता) प्रदान गरेको छ। राहत हस्तान्तरण गर्दै लायन्स क्लबका अध्यक्ष चिन्तामणि चापागाईंले विपत्तिको समयमा क्लब सधैँ सारथि बनेर सहयोग गर्न तत्पर रहेको बताउनुभयो।

आगलागीबाट सर्वस्व गुमाएका रोका परिवारलाई विभिन्न संघसंस्था र स्थानीयवासीले स्वतःस्फूर्त रूपमा सहयोग गर्दै पुनर्निर्माणमा साथ दिएका छन्। विपत्तिको यस घडीमा अन्य सहयोगी दाताहरूलाई पनि सहयोग गर्न स्थानीयले आग्रह गरेका छन्। यद्यपि, यति ठूलो क्षति व्यहोर्दा समेत हालसम्म स्थानीय सरकारको तर्फबाट भने कुनै पनि राहत वा सहयोग उपलब्ध नभएको गुनासो गरिएको छ।