स्याङ्जाका बजार अनुगमन,  ग्यासको कृत्रिम अभाव गराउनेलाई कारबाही

खाना पकाउने ग्यासमा कृत्रिम अभाव सिर्जना गरी उपभोक्ता ठग्ने र कालोबजारी गर्ने सम्भावनालाई रोक्न स्याङ्जाका विभिन्न बजारमा प्रशासनले अनुगमन गरेको छ ।

जिल्ला प्रशासन कार्यालय स्याङ्जाको पहलमा बुधबार जिल्लाका प्रमुख व्यापारिक केन्द्रमा रहेका ग्यास डिलर तथा पसलहरूको अवस्था बुझ्न स्थलगत निरीक्षण गरिएको हो ।

अनुगमन टोलीले पुतलीबजार, राङ्खोला, बयरघारी, वालिङ र गल्याङलगायत क्षेत्रका ग्यास विक्रेताको पसलमा पुगेर ग्यासको मौज्दात, वितरण प्रक्रिया र मूल्यबारे जाँच गरेको थियो ।

सहायक प्रमुख जिल्ला अधिकारी प्रेम सुवेदीको नेतृत्वमा खटिएको संयुक्त टोलीले दिनभर बजारमा ग्यास सिलिन्डरको तौल, परिमाण तथा बिक्री गर्दा अनिवार्य बिलबिजक जारी गरिएको छ कि छैन भन्ने विषयमा समेत जाँचबुझ गरेको थियो ।

जाँचका क्रममा नियम विपरीत कारोबार गरेको पाइएका केही डिलरलाई तत्काल जरिवाना गरिएको प्रशासनले जनाएको छ । साथै अन्य व्यवसायीलाई पनि व्यापारिक मापदण्ड पालना गर्न निर्देशन दिँदै सचेत गराइएको छ ।

अनुगमन टोलीमा एकीकृत सेवा कार्यालय स्याङ्जाका प्रमुख जीवन पौडेल, उपभोक्ता मञ्च स्याङ्जाका अध्यक्ष राजेन्द्र मरासिनी, जिल्ला प्रहरी कार्यालयका प्रहरी सहायक निरीक्षक भिमबहादुर भण्डारी मगर, जिल्ला प्रशासन कार्यालयका लेखापाल रमेश विक र नायब सुब्बा बुद्धि प्रसाद शर्मा लगायतको सहभागिता रहेको थियो ।

अनुगमनपछि सहायक प्रमुख जिल्ला अधिकारी सुवेदीले जिल्लामा खाना पकाउने ग्यासको अभाव नभएको बताउनुभयो । कृत्रिम अभाव देखाएर महँगोमा बिक्री गर्ने वा अनावश्यक रूपमा ग्यास थुपारेर राख्ने व्यवसायीलाई कडा कारबाही गरिने चेतावनी दिनुभएको छ।उपभोक्ताको हित संरक्षणका लागि बजार अनुगमनलाई निरन्तरता दिइने प्रशासनले जनाएको छ ।