वालिङ एक्स्पो सुरू , स्थानीय परिकार को मुख्य आकर्षण 

स्मार्ट सिटीको रूपमा विकास भैरहेको  वालिङमा बिहीवारदेखि  फस्ट वालिङ  एक्स्पो सुरू भएको छ। ओमकार इभेन्ट हबद्वारा आयोजित यस मेलाको  उद्घाटन वालिङ नगरपालिका का नगरप्रमुख कृष्ण खाँण गर्नुभएको  हो।

मेलाको उद्घाटन गर्दै नगर प्रमुख खाँणले मेला महाेत्सवले स्थानीय उत्पादनकाे प्रवर्द्धनसँगै  वालिङलाई राष्ट्रिय स्तरमा चिनाउन सहयोग गर्ने बताउनुभयो। उहाँले वालिङ एक्स्पोले वालिङमा बसोबास गर्ने  जातजाति, भेषभुषा तथा स्थानीय खानाका परिकारको समेत प्रचार हुने विश्वास व्यक्त गर्नुभयो। 

महोत्सवको मुख्य उद्देश्य स्थानीय खानाका परिकार तथा संस्कृति प्रवर्द्धन गर्नु रहेको आयोजकको भनाइ छ। साथै विभिन्न स्टल, मनोरञ्जन कार्यक्रम र लाइभ कन्सर्टहरू महोत्सवका थप आकर्षणका रूपमा रहेका छन्।

आयोजकका अनुसार बालबालिका तथा ज्येष्ठ नागरिकका लागि निशुल्क टिकट सुविधा समेत व्यवस्था गरिएको छ भने महोत्सव अवधिभर विभिन्न सांस्कृतिक तथा मनोरञ्जनात्मक कार्यक्रमहरू निरन्तर सञ्चालन हुनेछन्। महोत्सवमा कुनै पनि पास बितरण नगरिने आयोजकले जनाएको छ ।

बैशाख ०२ गतेसम्म सञ्चालन हुने मेला वालिङ खेलमैदानमा भइरहेको छ। महोत्सवमा स्थानीय कला, संस्कृति, खानाका परिकार तथा मनोरञ्जनात्मक कार्यक्रमहरू प्रस्तुत गरिएका छन्।

उद्घाटन सत्रमा कलाकार शिव शर्मा र कृष्णा गुरुङले आकर्षक सांगीतिक प्रस्तुति दिनुभएको थियो। कार्यक्रमको सञ्चालन जगत गौडेलले गर्नुभएको थियो।