भीरकोट सहकारीद्वारा १ सय ११ जना विद्यार्थीलाई स्टेसनरी वितरण

भीरकोट बचत तथा ऋण सहकारी संस्था लिमिटेडले आफ्नो सामाजिक उत्तरदायित्व कार्यक्रमअन्तर्गत विभिन्न विद्यालयका विद्यार्थीलाई शैक्षिक सामग्री वितरण गरेको छ। संस्थाले बिहीबार भीरकोट नगरपालिकाका पाँच वटा विद्यालयका १११ जना विद्यार्थीलाई झोला, कापी तथा कलम वितरण गरेको हो।

सहकारी संस्थाले भीरकोट–५ स्थित तिलारनेटा आधारभूत विद्यालयका १६ जना, भीरकोट–६ स्थित जनसेवा आधारभूत विद्यालय फोक्सिङका २२ जना, भीरकोट–७ स्थित जनज्योति आधारभूत विद्यालय पासिनडाँडाका १९ जना, भीरकोट–६ स्थित सिमलचौर विकास केन्द्रका १५ जना तथा भीरकोट–१ स्थित लक्ष्मी आधारभूत विद्यालय जगतपुरका ३९ जना विद्यार्थीलाई शैक्षिक सामग्री उपलब्ध गराएको जनाएको छ।

विद्यार्थीलाई अध्ययनमा थप उत्प्रेरणा प्रदान गर्ने उद्देश्यले सामग्री वितरण गरिएको संस्थाले जनाएको छ। कार्यक्रमका क्रममा विद्यालयका विद्यार्थी, शिक्षक, अभिभावक तथा स्थानीय समुदायका प्रतिनिधिहरूको सहभागिता रहेको थियो।

यसैगरी, संस्थाले सम्पूर्ण विद्यालयलाई  साझा प्रयोगका १/१ थान र  क्षेत्री समाज भवनमा तातो–चिसो पिउने पानीको व्यवस्था गर्न एक थान वाटर डिस्पेन्सर पनि हस्तान्तरण गरेको छ। उक्त सहयोगबाट विद्यालय तथा समुदायस्तरमा स्वच्छ पिउने पानीको पहुँच सहज हुने अपेक्षा गरिएको छ।

कार्यक्रममा बोल्दै सहकारी संस्थाका प्रबन्धक रामु अर्यालले सहकारीले सामाजिक उत्तरदायित्वलाई प्राथमिकतामा राख्दै शिक्षा क्षेत्रलाई विशेष महत्व दिएको बताउनुभयो। उहाँले बालमैत्री नगरपालिका निर्माणको अभियानलाई सहयोग पुर्‍याउने उद्देश्यले विद्यालय र विद्यार्थीलाई केन्द्रमा राखेर कार्यक्रम सञ्चालन गरिएको जानकारी दिनुभयो।
सहकारी संस्थाले आगामी दिनमा पनि शिक्षा, स्वास्थ्य तथा सामाजिक विकाससँग सम्बन्धित विभिन्न कार्यक्रम सञ्चालन गर्दै समुदायप्रति आफ्नो जिम्मेवारी निर्वाह गर्ने प्रतिबद्धता व्यक्त गरेको छ।