स्याङ्जामा बढ्दो बाँदर आतंक, कृषकहरू समस्यामा

स्याङ्जा जिल्लाका विभिन्न स्थानीय तहमा बाँदर आतंक दिनप्रतिदिन बढ्दै गएको छ। बाँदरका हुलले मकै, आलु, फलफूललगायत विभिन्न बालीनाली नष्ट गर्न थालेपछि किसानहरू ठूलो समस्यामा परेका छन्। 

पछिल्लो समय बाँदरहरू खेतबारीमा मात्र सीमित नभई घरघरमै प्रवेश गरी खाद्यान्न तथा अन्य सामग्रीमा क्षति पुर्‍याउन थालेका छन्। विशेषगरी वालिङ नगरपालिका र भीरकोट नगरपालिकाका ग्रामीण क्षेत्रमा बाँदर आतंक अत्यधिक रहेको स्थानीयवासी बताउँछन्। 

किसानहरूले वर्षभरि दुःख गरेर लगाएको बाली पाक्ने समयमा बाँदरले नष्ट गर्दा कृषि उत्पादनमा प्रत्यक्ष असर परेको छ।

भीरकोट ४ कि हिरा रेग्मीले  बढ्दो बाँदरका हुलले मान्छेलाई पनि झम्टिन आउने खतरा र खेतका मकै खाने भएकाले तातो घाममा बसेर बाँदर धपाउनु पर्ने बाध्यता रहेको बताउनु भयो ।

भीरकोट ६ का यादव कोइरालाले बाँदर आतंक  नियन्त्रण गर्न अति आवश्यक रहेको हुँदा बस्ती र खेतबारी आसपासका रूख र झाडी फाड्ने अभियान सुरू गर्न आवश्यक रहेको बताउनुभयो। उहाँले सरकारले नीति बनाएरै समस्याको समाधानमा चासो दिनुपर्ने बताउनुभयो।

वालिङ ९ का भविश्वर गैह्रेले सरकारले बाँदर पाल्न पाउने नीति ल्याई एक घर एक बाँदर पाल्ने व्यवस्था मिलाए कृषकलाई राहत हुने बताए।

स्थानीयवासीका अनुसार समस्या वर्षौंदेखि दोहोरिँदै आए पनि दीर्घकालीन समाधान हुन सकेको छैन। उनीहरूले सरकार तथा सम्बन्धित निकायले वैज्ञानिक अध्ययन, आधुनिक प्रविधिको प्रयोग र प्रभावकारी रणनीति अपनाएर बाँदर नियन्त्रणमा विशेष योजना ल्याउनुपर्ने माग गरेका छन्।

कृषि क्षेत्र स्याङ्जाको अर्थतन्त्रको महत्वपूर्ण आधार भएकाले बाँदर आतंक नियन्त्रण गर्न सके किसानको उत्पादन वृद्धि हुनुका साथै कृषि क्षेत्रमा ठूलो सकारात्मक परिवर्तन ल्याउन सकिने स्थानीयको विश्वास छ। त्यसैले समस्या समाधानका लागि स्थानीय, प्रदेश र संघीय सरकारबीच समन्वय गरी दीर्घकालीन रणनीति लागू गर्नुपर्ने आवश्यकता देखिएको छ।