स्याङ्जाका पत्रकारलाई क्षमता  अभिवृद्धि तालिम  

नेपाल पत्रकार महासंघ जिल्ला शाखा स्याङ्जाको आयोजनामा पत्रकारहरूको पेशागत दक्षता अभिवृद्धि गर्ने उद्देश्यले दुई दिने क्षमता अभिवृद्धि कार्यक्रम भएको छ।

पुतलीबजार नगरपालिकाको सहयोगमा स्याङ्जा सदरमुकाममा आयोजित कार्यक्रममा वरिष्ठ पत्रकार केशवशरण लामिछाने र भरत कोइरालाले पत्रकारिता क्षेत्रमा विकसित हुँदै गएको कृत्रिम बुद्धिमत्ता (एआई) को प्रयोग, यसका अवसर तथा डिजिटल एवं छापा पत्रकारितामा देखिएका चुनौतीका विषयमा प्रशिक्षण दिनुभएको  थियो।

कार्यक्रमको उद्घाटन सत्रमा नेपाल पत्रकार महासंघ स्याङ्जाका अध्यक्ष प्रदीप कोइरालाले पत्रकारहरूको क्षमता विकासका लागि महासंघ प्रतिबद्ध रहेको बताउनुभयो। प्रशिक्षकरूले  पत्रकारहरूको ज्ञान, सीप र दक्षता अभिवृद्धिका लागि यस्ता कार्यक्रम नियमित रूपमा सञ्चालन हुँदै आएको जानकारी दिनुभयो।

पुतलीबजार नगरपालिकाको सहयोगमा सञ्चालन भएको उक्त कार्यक्रममा जिल्लाका विभिन्न सञ्चारमाध्यममा कार्यरत पत्रकारहरूको सहभागिता रहेको थियो।