कमल पंगेनी स्मृति प्रतिष्ठानद्वारा विद्यालय पोशाक वितरण

कमल पंगेनी स्मृति प्रतिष्ठानले भीरकोट नगरपालिकाका दुई माध्यमिक विद्यालयका विद्यार्थीलाई विद्यालय पोशाक वितरण गरेको छ।

प्रतिष्ठानका अध्यक्ष लिला प्रसाद पंगेनीका अनुसार भीरकोट–२ स्थित दहथुम माध्यमिक विद्यालयका २० जना तथा भीरकोट–५ स्थित जनप्रिय माध्यमिक विद्यालयका ४० जना गरी कुल ६० जना विद्यार्थीलाई विद्यालय पोशाक वितरण गरिएको हो।प्रतिष्ठानका अध्यक्ष पंगेनीले आर्थिक रूपमा विपन्न तथा आवश्यकतामा रहेका विद्यार्थीलाई पढाइप्रती उत्प्रेरित गर्ने उद्देश्यले  पंगेनीको आठौं स्मृति दिवसको अवसरमा  विद्यालय पोशाक वितरण गरिएको बताएका छन्।

पोशाक वितरण कार्यक्रममा भीरकोट नगरपालिकाका निवर्तमान नगरप्रमुख छायाराम खनाल, भीरकोट–पोखरा सामिप्य सदनका अध्यक्ष श्याम रेग्मी, नेपाली कांग्रेस भीरकोटका सभापति यामप्रसाद अधिकारी, कमल पंगेनी स्मृति प्रतिष्ठानका पदाधिकारी, विद्यालय व्यवस्थापन समितिका पदाधिकारी, शिक्षक तथा स्थानीय अभिभावकहरूको उपस्थिति रहेको थियो।

दहथुम माध्यमिक विद्यालयका प्रधानाध्यापक डा. तोयनाथ कोइराला र जनप्रिय मा.वि. का प्रधानाध्यापक राजेन्द्र खाँणले प्रतिष्ठानको सहयोगप्रती आभार व्यक्त गरेका छन्।

संविधान सभा सदस्य स्वर्गीय कमल पंगेनी नेपाली काँग्रेसका लोकप्रिय नेता थिए। कमल पंगेनीको स्मृतिमा सामाजिक काम गर्ने उद्देश्यले प्रतिष्ठान गठन गरिएको अध्यक्ष पंगेनीले जानकारी दिए।