लायन्स क्लब अफ भीरकोटद्वारा वृक्षारोपण

लायन्स क्लब अफ भीरकोटले आफ्नो नियमित वार्षिक कार्यक्रमअन्तर्गत वातावरण संरक्षण अभियानलाई निरन्तरता दिँदै भीरकोट नगरपालिका– ६ स्थित सिमलचौर सामुदायिक भवन परिसरमा रहेको सिमलचौर पार्कमा वृक्षारोपण गरेको छ।

कार्यक्रममा पार्क परिसरमा १०८ वटा कपुर, निम, चाँप लगायत विभिन्न प्रजातिका फूलका  बिरुवा रोपिएका थिए। मानव सेवामा समर्पित परोपकारी संस्था लायन्सले वातावरण संरक्षण, पार्कको सौन्दर्यीकरण तथा हरियाली प्रवर्द्धन गर्ने उद्देश्यले उक्त कार्यक्रम आयोजना गरेको जनाएको छ।

कार्यक्रमका प्रमुख अतिथि तथा लायन्स क्लब अफ भीरकोटका संस्थापक अध्यक्ष यामप्रसाद अधिकारीले लायन्स अन्तर्राष्ट्रिय रूपमा मानवीय सेवा र परोपकारी कार्यमा समर्पित संस्था भएको उल्लेख गर्दै स्थानीय सरकार, आमा समूह तथा विभिन्न सामाजिक संस्थासँग समन्वय गरी समाजोपयोगी कार्यक्रम सञ्चालन गर्दै आएको बताए। वातावरण संरक्षण अभियानअन्तर्गत सिमलचौर पार्कमा गरिएको वृक्षारोपणले हरियाली प्रवर्द्धनका साथै भावी पुस्ताका लागि सकारात्मक सन्देश दिने विश्वास उनले व्यक्त गरे।

विशिष्ट अतिथिका रूपमा बोल्दै भीरकोट नगरपालिका वडा नं. ६ का अध्यक्ष लक्ष्मण खत्री क्षेत्रीले वडा कार्यालयले सिमलचौर पार्कलाई व्यवस्थित सार्वजनिक पार्कका रूपमा विकास गर्ने योजना अघि बढाएको जानकारी दिए। पार्कको सौन्दर्य अभिवृद्धिका लागि फूल तथा विभिन्न प्रजातिका बिरुवा रोपेर सहयोग गरेकोमा उनले लायन्स क्लबप्रति आभार व्यक्त गरे।

जनजागरण आमा समूहकी अध्यक्ष लिलावती के.सी.ले वातावरण संरक्षणका लागि लायन्स क्लबले थालेको अभियानको प्रशंसा गर्दै रोपिएका बिरुवाको संरक्षण र नियमित हेरचाहमा आमा समूहले पूर्ण सहयोग गर्ने प्रतिबद्धता व्यक्त गरिन्।

क्लबका अध्यक्ष लेख बहादुर के.सी. (किरण) ले आमा समुहको सहकार्यमा वृक्षारोपण गर्न पाएकोमा खुशी व्यक्त गरे।  वर्षभरी समाजलाई सन्देश दिने उपयोगी सामाजिक क्रियाकलाप गरिने संचालन गरिने उनले बताए।

कार्यक्रममा लायन्स क्लबका पूर्व अध्यक्ष ढाकाराम खनाल, निवर्तमान अध्यक्ष चिन्तामणि चापागाईं, क्लबका पदाधिकारी तथा सदस्यहरू र आमा समुहका सदस्यहरूको सहभागिता रहेको थियो। अध्यक्ष के.सी. को जन्मदिनको अवसर समेत पारेर वृक्षारोपण रोपण गरिएको क्लबका सचिव राजन सुनारले जानकारी दिए।