बाढीपीडितका लागि भीरकोट नगरपालिकाको ५ लाख सहयोग 

भीरकोट नगरपालिकाले भोटेकोशी नदीमा आएको ठूलो बाढीबाट प्रभावित विभिन्न जिल्लाका बाढीपीडितलाई आर्थिक सहयोग गर्ने निर्णय  गरेको छ।

नगरपालिकाको १४७ औं कार्यपालिका बैठकले  बाढीका कारण रसुवा, नुवाकोट, गोरखा, धादिङ र चितवनका विभिन्न तटीय क्षेत्रमा भएको क्षतिप्रति दुःख व्यक्त गर्दै पीडित परिवारप्रति समवेदना प्रकट गरेछ। बाढीमा परी ज्यान गुमाएका व्यक्तिहरूप्रति श्रद्धाञ्जली अर्पण गर्दै घाइते तथा प्रभावितको उद्धार, उपचार र राहतका लागि नगरपालिकाको तर्फबाट संस्थागत रूपमा ५ लाख  सहयोग गर्ने निर्णय गरिएको नगर प्रमुख गोविन्द कुमार कर्माचार्यले जानकारी दिए।

यसैगरी कार्यपालिका बैठकले  जनप्रतिनिधिको सेवा सुविधाबाट २ लाख रुपैयाँ सहयोग उपलब्ध गराउने निर्णय गरेको  छ। नगरपालिकामा कार्यरत कर्मचारी तथा शिक्षकको पाँच दिन बराबरको तलबबाट प्राप्त हुने रकम समेत सहयोग गर्ने निर्णय भएको छ।

उक्त रकम नेपाल सरकार, प्रधानमन्त्री तथा मन्त्रिपरिषद्को कार्यालयमा रहेको दैवी प्रकोप उद्धार कोषमा उपलब्ध गराइने नगर प्रमुख कर्माचार्यले जानकारी दिए।