ज्योती गायनले बढ्यो रमाइलो मेलाको रौनक

लोकप्रियताका हिसाबले आफ्नो छुट्टै स्थान बनाएकी लोकगायिका ज्योति मगरले बयरघारी रमाइलो मेलाको रौनक बढाइदिनुभएको छ। दर्शकको मन जित्ने प्रस्तुतिका कारण बुधबार साँझ रमाइलो मेला उत्साहपूर्ण तरिकाले रङ्गिन बनेको थियो।

स्याङ्जाको भीरकोट नगरपालिका -१ स्थित सिसौघारी खेलमैदानमा असोज २३ गते उद्घाटन भएको रमाइलो मेलाका सुरुका केहि दिन खासै रौनक देखिएन । तर असोज २९ मा लोकगायिका ज्योति मगरको आगमनले माहोल एक्कासी बदलियो । लोकगायिका मगरले आफ्ना जोशिला प्रस्तुति दिएपछि मेलामा भीड बढ्दै गयो ।

असोज २९ गते मेलाका प्रमुख आकर्षणको रूपमा ज्योति मगरको नाम घोषणा भएपछि मेला एकाएक रोमाञ्चित बन्यो । उनको आगमनसँगै रमाइलो मेलामा जनसागर उर्लियो ।

टाढाटाढाका बस्तीबाट मगरलाई प्रत्यक्ष हेर्न सयौं मानिस बयरघारी बजार आइपुगेका थिए । मगरले करिब एक घण्टासम्म स्टेजमा आफ्नो दमदार प्रस्तुति दिनुभयो 'मलाई हेरी हेरी, लठ्ठै पर्‍यो तन्नेरी.....' बोलको गीतले महोत्सवमा आफ्नो प्रस्तुति सुरु गरेकी मगरले दर्शकलाई भरपूर मनोरञ्जन प्रदान गर्नुभयो ।

'कान्छी मुसुक्कै, पैसा भुसुक्कै...', 'चोरी खान पल्केको त्यो ढाडे बिरालो....', 'नाचौंला मादलु तालैमा....', 'उहि मुलाको सिन्की उहि मुलाको चाना....' लगायतका गीत गाएर मगरले रमाइलो मेलामा दर्शकलाई मन्त्रमुग्ध बनाउनुभएको थियो।

बुधबार रमाइलो मेलामा अमर धिताल, नेत्र खड्का, करिस्मा बिसि, राजेश भण्डारी, रबिन एसके, कार्यक्रम संचालिका समेत रहेकी मुना अर्यालले आआफ्ना प्रस्तुतिबाट दर्शकलाई मनोरञ्जन प्रदान गर्नुभएको थियो। यस्तै, मोडल तथा डान्सर भूमिका पंगेनीले नृत्य प्रस्तुत गर्नुभएको थियो।बयरघारी पिस युथ क्लबद्वारा आयोजित रमाइलो मेला आगामी कार्तिक २ गतेसम्म चल्नेछ ।