शिक्षकको कथा बोकेको चलचित्र ‘गुरुआमा’ आगामी वैशाखमा प्रदर्शनमा आउने

प्रेम सोनी सुनारको लेखन, निर्माण तथा निर्देशन रहेको नेपाली कथानक चलचित्र ‘गुरुआमा’ को प्रदर्शन मिति घोषणा गरिएको छ। निर्माण पक्षले सामाजिक सञ्जालमार्फत चलचित्रको पोस्टर सार्वजनिक गर्दै आगामी २०८३ साल वैशाख २५ गतेदेखि देशभर प्रदर्शन गर्ने जानकारी दिएको हो।

सोनी फिल्मस प्रालिको ब्यानरमा निर्माण भएको यस चलचित्रले शिक्षक पेसाको गरिमा, त्याग र समाज निर्माणमा उनीहरूको भूमिकालाई मुख्य विषयवस्तु बनाएको छ। नयाँ वर्ष २०८३ को अवसर पारेर चलचित्र दर्शकमाझ ल्याउन लागिएको निर्देशक सुनारले जानकारी दिनुभयो।

उहाँले भन्नुभयो, “यो चलचित्र केवल मनोरञ्जनका लागि मात्र होइन, विद्यार्थी, शिक्षक, अभिभावक र समग्र सामाजिक जीवनको महत्त्वपूर्ण पाठ हो।” उहाँले नेपाली समाजमा शिक्षकले निर्वाह गर्ने अदृश्य तर महत्त्वपूर्ण भूमिकालाई कलात्मक ढङ्गले पर्दामा उतार्ने प्रयास गरिएको बताउनुभयो।

कलाकारहरूको जम्बो टोली चलचित्रमा वरिष्ठ अभिनेत्री मिथिला शर्मा, बुद्धि तामाङ, प्रेम सोनी सुनार, सुशील पोखरेल, ध्रुव कोइराला र टीका सानुको मुख्य भूमिका रहेको छ। त्यस्तै, चलचित्रमा चर्चित अभिनेत्रीहरू गौरी मल्ल र पूजा शर्माको विशेष अतिथि भूमिका (Guest Appearance) रहेको छ, जसले कथालाई थप सशक्त बनाएको अपेक्षा गरिएको छ।

अन्य कलाकारहरूमा उत्तम केसी, राधिका हमाल, बालचन्द्र बराल, गिरीप्रसाद पुन, उषा कार्की, पदम थापा, केपी बागदास, टंक मरासिनी, जस्मिन मगर, सदीक्षा शर्मा, आदर्श गहतराज, अर्नब घिमिरे, सफल पौडेल, विश्वास नेपाल र कमला परियारको अभिनय रहेको छ।

चलचित्रले शिक्षक–विद्यार्थी सम्बन्ध, संघर्ष र सम्मानका कथाहरूलाई मार्मिक ढङ्गले उठान गरेकाले यसलाई प्रतिक्षित चलचित्रका रूपमा हेरिएको छ।