नेपाली लेखक संघ स्याङ्जाद्वारा वालिङमा अन्तरक्रिया तथा सिर्जना वाचन सम्पन्न

वालिङ, स्याङ्जा । चौथो राष्ट्रिय लेखक दिवसको सन्दर्भ पारेर नेपाली लेखक संघ (२००८), स्याङ्जाले “स्रष्टा : राज्यसत्ताको स्थायी प्रतिपक्ष” विषयक अन्तरक्रिया तथा सिर्जना वाचन कार्यक्रम सम्पन्न गरेको छ। उक्त कार्यक्रम बुधबार (वैशाख १६ गते) वालिङ नगरपालिका–६, मिर्दीस्थित नेचुरल भ्यू पोइन्ट रेस्टुरेन्टको सभाकक्षमा सम्पन्न भएको हो।

युवा स्रष्टा पारिश्वर न्यौपानेको अध्यक्षतामा सम्पन्न भएको उक्त कार्यक्रममा वक्ताद्वय अग्रज स्रष्टा ध्रुवप्रसाद शर्मा पंगेनी र अनन्त अर्यालले "स्रष्टा : राज्यसत्ताको स्थायी प्रतिपक्ष" विषयमा आ–आफ्ना सारगर्भित विचार प्रस्तुत गर्नुभएको थियो। कार्यक्रममा शैक्षिक व्यक्तित्व लक्ष्मीप्रसाद रेग्मीले शुभकामना मन्तव्य राख्नुभएको थियो।

सिर्जना वाचनमा स्रष्टाहरूको उत्साहजनक सहभागिता अन्तरक्रियासँगै आयोजना गरिएको सिर्जना वाचन सत्रमा स्याङ्जाली स्रष्टाहरूको उत्साहजनक उपस्थिति रहेको थियो। कार्यक्रममा स्रष्टाहरू शोभाकान्त रेग्मी, वसन्त खनाल, शम्भु अर्याल, नारायणप्रसाद रेग्मी, सुलभ खनाल र ढालबहादुर केसी लगायतले आ–आफ्ना उत्कृष्ट साहित्यिक रचनाहरू वाचन गर्नुभएको थियो।

साहित्य र राज्यसत्ताको सम्बन्धलाई लिएर गरिएको यो बहसले स्रष्टाहरूलाई समाजप्रति थप उत्तरदायी बन्न प्रेरित गरेको सहभागीहरूले बताएका छन्। कार्यक्रमको सहजीकरण युवा स्रष्टा तथा साहित्यिक अभियन्ता मिलन समीरले गर्नुभएको थियो।