कला - साहित्य

‘अध्यात्म पथ’ र ‘गौ माताको महत्त्व’ कृतिहरूको विमोचन

स्मार्ट अखबार

शनिबार, भदौ २०, २०८३

‘अध्यात्म पथ’ र ‘गौ माताको महत्त्व’ कृतिहरूको विमोचन

स्याङ्जामा सनातन धर्म, दर्शन, संस्कृति र आध्यात्मिक चेतनासँग सम्बन्धित दुई महत्वपूर्ण कृति ‘अध्यात्म पथ’ र ‘गौ माताको महत्त्व’ एक समारोहबीच विमोचन गरिएको छ।भीरकोट नगरपालिका–८, छोरेडाँडा कामधेनु गौशालाको आयोजनामा भएको एक एक धार्मिक समारोहकाबीच स्रष्टा प्रेमप्रसाद खनालद्वारा लिखित दुवै कृतिको विमोचन गरिएको हो ।

असी वर्षीय स्रष्टा प्रेमप्रसाद खनालद्वारा लिखित दुवै कृतिको विमोचन आध्यात्मिक गुरु चैतन्य कृष्ण प्रभु, गण्डकी प्रदेशका पूर्व मन्त्री मेखलाल श्रेष्ठ, प्राज्ञ डा. तुलसीराम खनाल, साहित्यकार विश्वप्रेम अधिकारीलगायतका व्यक्तित्वहरूले संयुक्त रूपमा गरेका थिए ।

विमोचन समारोहमा बोल्दै वक्ताहरूले लामो जीवन अनुभव, अध्ययन र चिन्तनबाट सिर्जित यी कृतिले सनातन धर्म, संस्कृति र आध्यात्मिक ज्ञानको संरक्षण तथा नयाँ पुस्तासम्म यसको महत्व पुर्‍याउन महत्वपूर्ण भूमिका खेल्ने विश्वास व्यक्त गरेका थिए ।

‘अध्यात्म पथ’ कृतिमा वेद, उपनिषद्, पुराण, श्रीमद्भगवद्गीता लगायत विभिन्न धार्मिक तथा दार्शनिक ग्रन्थमा समेटिएका ज्ञान र दर्शनलाई लेखक प्रेमप्रसाद खनालले आफ्नै मौलिक दृष्टिकोण र शैलीमा व्याख्या गरेका छन् ।

शास्त्रीय ग्रन्थका विषयवस्तुलाई केवल धार्मिक दृष्टिले मात्र नभई मानव जीवन, आचरण, आत्मचिन्तन र जीवनदर्शनसँग जोडेर बुझाउने प्रयास कृतिमा गरिएको छ।

त्यसैगरी ‘गौ माताको महत्त्व’ कृतिमा सनातन परम्परामा गाईको धार्मिक, सांस्कृतिक तथा आध्यात्मिक स्थानबारे चर्चा गरिएको छ। भगवान् राम, श्रीकृष्ण, महादेव लगायत विभिन्न देवी–देवतासँग गाईको सम्बन्ध, हिन्दू धर्मका पुराण तथा शास्त्रहरूमा गाईबारे उल्लेख गरिएका प्रसङ्ग र सनातन संस्कृतिमा गौमाताको महत्वलाई कृतिले आधार बनाएको छ।

कार्यक्रममा डा. तुलसीराम खनाल, छायाराम खनाल, चैतन्य कृष्ण प्रभु, पूर्वमन्त्री मेखलाल श्रेष्ठ लगायतले मन्तव्य राख्दै दुवै कृतिको विषयवस्तु र महत्वबारे चर्चा गरेका थिए । वक्ताहरूले ८० वर्षको उमेरमा लेखक खनालले आफ्नो दीर्घ जीवनयात्रामा संकलित अनुभव, अध्ययन र आध्यात्मिक चिन्तनलाई पुस्तकका रूपमा प्रस्तुत गर्नु आफैंमा प्रेरणादायी कार्य भएको बताए ।

वक्ताहरूले पछिल्लो पुस्तामा आफ्नो धर्म, संस्कृति, संस्कार र मौलिक ज्ञानप्रति रुचि घट्दै गइरहेको अवस्थामा यस्ता कृतिले सनातन दर्शन र सांस्कृतिक चेतनालाई नयाँ पुस्तासम्म पुर्‍याउन सेतुको भूमिका निर्वाह गर्न सक्ने धारणा व्यक्त गरे ।

छोरेडाँडा कामधेनु गौशालाको प्राङ्गणमा आयोजित कार्यक्रममा स्थानीयवासी, साहित्य तथा संस्कृतिप्रेमी, आध्यात्मिक चिन्तक, सामाजिक व्यक्तित्व र शुभेच्छुकहरूको उपस्थिति रहेको थियो। असी वर्षीय लेखक प्रेमप्रसाद खनालका ‘अध्यात्म पथ’ र ‘गौ माताको महत्त्व’ दुवै कृति अनुभव, अध्ययन र सनातन दर्शनप्रतिको आस्थाबाट जन्मिएका सिर्जनाका रूपमा समारोहमा प्रस्तुत भएका छन्। साहित्य, अध्यात्म र सनातन संस्कृतिको संरक्षणमा यस्ता मौलिक कृतिको आवश्यकता रहेको डा. खनालले बताए ।

प्रकाशित मिति: शनिबार, भदौ २०, २०८३

प्रतिक्रिया दिनुहोस्