स्वर्ण  महोत्सवको तयारीमा भाग्योदय मा.वि.

भाग्योदय माध्यमिक विद्यालयले स्वर्ण महोत्सवको तयारी सुरू गरेको छ। स्याङ्जाको भीरकोट नगरपालिका वडा नं ६ मा अवस्थित पालिकाको एक मात्र नमुना माध्यमिक विद्यालयले आगामी माघ १२ गतेको सेरोफेरोमा विविध कार्यक्रम गरी स्वर्ण महोत्सव मनाउन लागेको हो।

स्वर्ण महोत्सवलाई शैक्षिक महोत्सवका रूपमा मनाउन शनिबार बसेको  विद्यालय व्यवस्थापन समिती, शिक्षक, पूर्व विद्यार्थी, पूर्व शिक्षक  र सरोकारवालाहरूको भेलाले ५सय १ सदस्यीय मूल समारोह समिती गठन गर्ने निर्णय गरेको छ। विद्यालय व्यवस्थापन समितिका अध्यक्ष एवं निवर्तमान नगर प्रमुख छायाराम खनालको अध्यक्षतामा मूल समारोह समिती गठन गरिने र समितिमा विद्यालय व्यवस्थापन समितिका पूर्व अध्यक्ष ,सदस्य,  पूर्व प्रधानाध्यापक ,  शिक्षक अभिभावक संघका अध्यक्ष, पूर्व शिक्षक, पूर्व विद्यार्थी , अक्षय कोष दाता, चन्दा दाता,वडा नं ५,६,७ र ८ का जनप्रतिनिधि, राजनीतिक दलका प्रतिनिधि समावेश हुने प्रधानाध्यापक रेशमलाल खनालले जानकारी दिनुभयो।

यसैगरी भेलाले ५ सदस्यीय स्मारिका सम्पादन समिती गठन गरेको छ। पूर्व विद्यार्थी डा. तुलसीराम खनालको नेतृत्वमा गठन भएको समितिमा विद्यालयका सहायक प्रधानाध्यापक पूण्य प्रसाद अर्याल, शिक्षकहरू पूण्य खनाल, लेखनाथ सुवेदी, पूर्व सहायक प्रधानाध्यापक हरी प्रसाद अर्याल रहनु भएको छ। स्वर्ण महोत्सवको प्रचारप्रसारको जिम्मेवारी पूर्व विद्यार्थी समाजका अध्यक्ष ढाकाराम खनाल र मातहतको कार्यसमितिलाई दिइएको छ।

विद्यालय व्यवस्थापन समितिका अध्यक्ष छायाराम खनालले स्वर्ण महोत्सवलाई भव्य र सभ्य रूपमा मनाउन विद्यालयलाई माया गर्ने सबैलाई सहयोग गर्न  आग्रह गर्नुभएको छ। स्वर्ण महोत्सवको अवसरमा स्वर्ण महोत्सव स्तम्भ बनाइने उहाँले बताउनुभयो। २०३३ सालमा स्थापना भएको विद्यालयलाई पालिकाको एक सबल र सक्षम विद्यालय बनाउन सहयोग गर्ने संस्थापक, चन्दादाता, अक्षयकोष दाता, पूर्व शिक्षक, विद्यार्थीलाई स्वर्ण महोत्सवमा  सम्मान गरिने गरिने उहाँले बताउनुभयो। स्वर्ण महोत्सवकै अवसरमा नयाँ शैक्षिक कार्यक्रम र भावी  रणनीतिक योजनाहरू समेत सार्वजनिक गरिने उहाँले जानकारी दिनुभयो।