प्रमुख बजार क्षेत्रमा यात्रु सहायता कक्ष स्थापना 

दसैँ, तिहार, छठजस्ता चाडपर्वलाई लक्षित गरी जिल्ला प्रहरी कार्यालय स्याङ्जाले सोमबारदेखि विशेष सुरक्षा योजना कार्यान्वयनमा ल्याएको छ । त्यसअनुसार जिल्लाका प्रमुख बजार क्षेत्रमा यात्रु सहायता कक्ष स्थापना गरिएको छ ।

स्याङ्जा सदरमुकाम स्थित बसपार्कमा आयोजित कार्यक्रममा प्रमुख जिल्ला अधिकारी ईश्वरीप्रसाद अर्यालले यात्रु सहायता कक्षको उद्घाटन गर्दै कक्ष स्थापना मात्र होइन, सेवाप्रवाह प्रभावकारी हुनेगरी काम गर्न निर्देशन दिनुभयो। अर्यालले यात्रुहरूले यात्रामा पर्न सक्ने असुविधा तत्काल समाधान हुने किसिमले सहायता कक्ष सञ्चालन गर्नुपर्नेमा जोड दिनुभयो ।

जिल्ला प्रहरी प्रमुख प्रहरी उपरीक्षक दधिराम न्यौपानेले चाडपर्वमा बढ्ने यात्रुको भीडसँगै पकेटमार, बढी भाडा असुल्ने, चालक सहचालकको अभद्र व्यवहारलगायतका समस्यालाई नियन्त्रण गर्न सहायता कक्ष टेवा पुग्ने बताउनुभयो ।

सोमबार स्याङ्जा, वालिङ् र गल्याङ बजारमा सहायता कक्ष सञ्चालनमा ल्याइएको जिल्ला ट्राफिक प्रहरी कार्यालय प्रमुख प्रहरी नायब निरीक्षक भुपेन्द्र प्रसाद गौलीले जानकारी दिनुभयो । उनका अनुसार जिल्लाका मुख्य बजार क्षेत्रमा सहायता कक्ष सञ्चालनमा ल्याइएको हो ।

यससँगै, चाडपर्व अवधिभर सादा पोशाक र पोशाकधारी प्रहरी परिचालन, पैदल र सवारी गस्ती, पिकेट तथा आवश्यकता अनुसार चेकजाँच गर्ने व्यवस्था गरिएको छ । देउसीभैलो तोकिएको समयमा मात्रै सञ्चालन गर्न दिने, आपराधिक गतिविधि रोक्न सचेतनामूलक कार्यक्रम, माइकिङ र समुदायस्तरमा समन्वय गरेर शान्ति–सुरक्षा कायम गर्ने तयारी भएको जिल्ला प्रहरी कार्यालयका सूचना अधिकारी प्रहरी नायब उपरीक्षक प्रशन्न राज चौधरीले जानकारी दिनुभयो ।