दोहोरो नागरिकता काण्ड : दिदीभाइ ३ लाख ५० हजार धरौटीमा छुटे

गल्याङ नगरपालिका–२ निवासी धनबहादुर थापाका छोरा ३६ वर्षीय मधु थापा र उनकी दिदी ४५ वर्षीया सपिना थापा दोहोरो नेपाली नागरिकता तथा नागरिकता र लिखतसम्बन्धी कसूर मुद्दामा धरौटीमा छुटेका छन्।

जिल्ला प्रशासन कार्यालय स्याङ्जाबाट प्राप्त पत्र जाहेरीका आधारमा मधु थापाले जिल्ला प्रशासन कार्यालय स्याङ्जाबाट मिति २०६५।०३।१९ गते ना.प्र.प.नं. ४२२०२८/३२४३३ को नेपाली नागरिकता लिएको उल्लेख छ। साथै, उनले एसएलसीको नक्कली शैक्षिक प्रमाणपत्र बनाई झुठ्ठा विवरण पेश गरी सोही कार्यालयबाट नुनबहादुर थापालाई बुबा बनाई आफ्नो नाम कुशल थापा र जन्ममिति २०४८।१०।१६ गते कायम गरी मिति २०७२।०८।०४ गते ना.प्र.प.नं. ४२२०२८/१०६२ को दोहोरो नेपाली नागरिकता लिएको आरोप छ।

त्यसैगरी, सोही कार्यालयबाट कुशल थापाको नाममा 09372828 नम्बरको राहदानीसमेत लिएको सम्बन्धमा कानुनबमोजिम कारबाही गर्न माग गरिएको थियो।

उक्त जाहेरीका आधारमा मिति २०८२।१२।१५ गते नागरिकता र लिखतसम्बन्धी कसूर मुद्दा दर्ता गरिएको थियो। प्रतिवादी मधु थापालाई मिति २०८३।०५।०८ गते र दोहोरो नागरिकता सनाखत गर्ने उनकी दिदी ४५ वर्षीया सपिना थापालाई मिति २०८३।०५।३१ गते पक्राउ गरिएको थियो।

मुद्दाको अनुसन्धान तथा कानुनी कारबाही प्रक्रिया पूरा गरी दुवै जनालाई मिति २०८३।०६।०५ गते स्याङ्जा जिल्ला अदालत, स्याङ्जामा पेश गरिएको थियो।

अदालतको आदेशअनुसार प्रतिवादी मधु थापा रु. २ लाख २५ हजार र सपिना थापा रु. १ लाख २५ हजार धरौटीमा छुटेका छन्। दुवै जनाबाट गरी कुल रु. ३ लाख ५० हजार धरौटी माग गरिएको हो।