प्रधानाध्यापक, लेखापाल र  अध्यक्ष  मिलेर ४ लाख ७१ हजार भ्रष्टाचार

स्याङ्जाको गल्याङ नगरपालिका -४ स्थित शिशु कल्याण माध्यमिक विद्यालयका तत्कालीन प्रधानाध्यापकसहित तीन जनामाथि अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ । अख्तियारले विद्यालयका तत्कालीन प्रधानाध्यापक रविलाल लुइँटेल, लेखापाल छविलाल गाहा, र विद्यालय व्यवस्थापन समितिका तत्कालीन अध्यक्ष राम थापा विरुद्ध आइतबार विशेष अदालत काठमाडौंमा मुद्दा दायर गरेको हो ।

अख्तियारका अनुसार ती तीनजनाले मिलेर कुल ४ लाख ७१ हजार ६ सय ६७ रुपैयाँ २६ पैसा अनियमितता गरेका छन् । सो रकम बिगो कायम गरी कैद सजाय र बिगो असुलउपरको माग गर्दै अख्तियारले विशेष अदालतमा मुद्दा दायर गरेको हो । सूचना प्रविधि कार्यक्रमका लागि आएको बजेट  र विद्यालयको कोषको रकम गरी मिलोमतोमा ४  लाख ७१ हजार ६  सय ६७ रुपैयाँ २६  पैसा  बराबरको रकम हिनामिना तथा हानिनोक्सानी गरेको गल्याङ नगरपालिकाबाट भएको स्थलगत प्रतिवेदन र आयोगबाट भएको स्थलगत अनुगमनबाट समेत देखिएको अख्तियारले जनाएको छ ।

अख्तियारका अनुसार आर्थिक वर्ष २०७८/७९ मा गल्याङ नगरपालिका –४ स्थित शिशु कल्याण माविमा आईसीटी (सूचना प्रविधि) कार्यक्रमका लागि आएको ६ लाख ५० हजार  बजेटबाट  विद्यालयले ७ थान कम्प्युटर, १ प्रोजेक्टर, १ ल्यापटप र १ प्रिन्टर खरिद गरेको देखाए पनि दुई कम्प्युटर, एक प्रोजेक्टर र एक प्रिन्टर विद्यालयमा नल्याई नक्कली प्रतिवेदन तयार गरिएको पाइएको अख्तियारका प्रवक्ता राजेन्द्र कुमार पौडेलले जानकारी दिनुभयो  ।पौडेलका अनुसार दुई कम्प्युटरको १ लाख २३ हजार रुपैयाँ, प्रोजेक्टरको ५८ हजार रुपैयाँ, र प्रिन्टरसहित गरी करिब २ लाख १७ हजार रुपैयाँको हिनामिना भएको देखिएको छ । यसबाहेक विद्यालय व्यवस्थापन समितिको निर्णयबिना प्रधानाध्यापकको नाममा २ लाख ५४ हजार ६ सय ६७ रुपैयाँ चेक काटेर विद्यालयको कोषबाट निकासा गरी फिर्ता नगरेको समेत अख्तियारको अनुसन्धानले देखाएको छ ।