बन्यो कक्षाकोठा, हट्यो बार्दलीमा पढाउनुपर्ने बाध्यता

बालमैत्री  भीरकोट नगरपालिका र स्मार्ट सिटीको रूपमा परिचित  वालिङ नगरपालिकाको सिमानामा रहेको गडी भञ्जाङ आधारभूत विद्यालयमा बार्दलीमा विद्यार्थी पढाउनुपर्ने बाध्यता अन्त्य भएको छ । २ कोठे नयाँ  भवन बनेपछि बार्दली र सिढीमा पढाउनुपर्ने बाध्यता अन्त्य भएको हो।

२०७२ सालको भूकम्पमा परी विद्यालय भवनमा क्षती पुगेपछि केही समय त्यही पुरानो भवनमा टिनले बारेर भएपनि पठनपाठन गरिएको थियो तर बर्षाको समयमा त्यो पनि भत्केपछि  सिढी र बार्दली नै कक्षाको रूपमा प्रयोग  गरिएको थियो। भीरकोट नगरपालिकाको वडा नं ५ मा अवस्थित शिशुदेखी ३ कक्षासम्म पढाइ हुने   गडी भञ्ज्याङ आधारभूत विद्यालयमा  कक्षाकोठाको अभावमा सात वर्षसम्म सिढी र बार्दलीमा विद्यार्थी पढाउनुपर्ने बाध्यता थियो। 

नगरपालिकाका भित्ता र सार्वजनिक स्थान बाल अधिकारका सचेनामूलक सन्देशले भरिए पनि भाषण र प्रचारमा जस्तो गत असारसम्म यहाँका विद्यार्थीहरूले बालमैत्री विद्यालयको अनुभूति यहाँका बालबालिकाले गर्न पाएका थिएनन् । कक्षाकोठाको अभावमा कक्षा २ र ३ ले बार्दली र सिढीमा पढ्दै आएका थिए।वर्षाको समयमा भने विद्यालयको कार्यालयमै राखेर पढाउनुपर्ने बाध्यता थियो।

आर्थिक वर्ष २०८१/८२ को असारमा २ कोठे भवन निर्माण भएपछि बार्दली र सिढीमा पढाउनुपर्ने बाध्यता अन्त्य भएको विद्यालयका प्रधानाध्यापक सरला बि.क. ले जानकारी दिनुभयो। नगरपालिकाले कक्षाकोठा निर्माणका लागि ५ लाख रकम विनियोजन गरेको थियो। ५ लाख २० हजार लागतमा टिनले छाएको २ कोठे भवन निर्माण सम्पन्न भएपछि  कक्षाकोठामा नै पठनपाठन भैरहेको प्रधानाध्यापक बि.क. ले जानकारी दिनुभयो।

जनजाति समुदायका विद्यार्थीको बाहुल्यता रहेको विद्यालयमा वालिङ र भीरकोट नगरपालिकाका ४६ जना विद्यार्थी अध्ययनरत छन्।  विद्यालयको नाममा ३ रोपनी जग्गा छ । तर  बालमैत्री नगरपालिकाको विद्यालयमा प्रार्थना गर्न र खेल्नका लागि खेलमैदान समेत छैन । कारण विद्यालयको आँगनबाट नै सडक खनिएको छ । शौचालय जान समेत सडक पार गरेर जानुपर्ने बाध्यता छ ।