तीन सय बाईस विद्यार्थीलाई विद्यालय पोशाक वितरण

अर्जुनचौपारी गाउँपालिका–१ मा रहेको पञ्च कन्या माध्यमिक विद्यालयमा ३ सय २२ जना विद्यार्थीलाई विद्यालय पोशाक वितरण गरिएको छ। यस विद्यालयमा अध्ययन गरेका २०६५ सालको एसएलसी ब्याचका पूर्व विद्यार्थीहरूले यो विद्यालय पोशाक वितरण गरेका हुन्।

देश तथा विदेशमा रहनुभएका २०६५ सालको एसएलसी ब्याचका ८४ मध्ये ४२ जना पूर्व विद्यार्थीहरूले सङ्कलन गर्नुभएको २ लाख ४१ हजार ५ सय रुपैयाँ बराबरको पोशाक वितरण गरिएको हो।

यहाँ कक्षा नर्सरी देखि कक्षा नौ सम्मका सबै विद्यार्थीलाई पोशाक वितरण गरिएको र अब कक्षा १०, ११ र १२ का कमजोर विद्यार्थीलाई पोशाक वितरण गरिने पूर्व विद्यार्थी एवं शिक्षक सुरेन्द्र काफ्लेले जानकारी दिनुभयो।

आफू पढ्दाको अनुभव सम्झँदै र बढो दुःख गर्नुभएको बताउँदै पूर्व विद्यार्थी प्रमोद लम्सालले विद्यार्थीहरूको पोशाकमा नियमितता हुनु शिक्षा र अनुशासन दुवैका लागि महत्त्वपूर्ण भएको बताउनुभयो। उहाँले आर्थिक दृष्टिले कमजोर वर्गका विद्यार्थीका लागि यस किसिमको सहयोग ठूलो राहतको रूपमा रहेको पनि प्रकाश पार्नुभयो।

पोशाक वितरण कार्यक्रममा गाउँपालिका उपाध्यक्ष सपना गुरुङले यस्ता सकारात्मक काममा पालिकाको सहयोग रहने बताउँदै सबैको चासो जानुपर्ने कुरामा जोड दिनुभयो।

कार्यक्रममा विद्यालय व्यवस्थापन समितिका अध्यक्ष मोहन बहादुर अधिकारीले विद्यार्थीको कार्यक्रमले विद्यालयसँग पूर्व विद्यार्थीको सम्बन्धलाई बलियो बनाउने अवसर प्रदान गरेको र अब प्रत्येक पूर्व विद्यार्थीसँग विद्यालय एकाकार हुने विश्वास व्यक्त गर्नुभयो।

कार्यक्रममा प्रधानाध्यापक जित बहादुर थापा, शिक्षक शोभाकान्त पौडेलले पनि आ-आफ्नो धारणा राख्नुभएको थियो।