विज्ञान प्रदर्शनीसहित पब्लिक एकेडेमीले मनायो ७४ औं वार्षिकोत्सब 

पब्लिक एकेडमी माध्यमिक विद्यालयले विज्ञान प्रदर्शनीसहित आफ्नो ७४ औं वार्षिकोत्सब मनाएको छ। भीरकोट नगरपालिका वडा नं ८ ढापुकमा अवस्थित विद्यालय २००९ सालमा स्थापना भएको थियो। विद्यालयले विविध सांस्कृतिक कार्यक्रम, विज्ञान प्रदर्शनी र अतिरिक्त क्रियाकलापको पुरस्कार वितरण , शिक्षक विद्यार्थी सम्मान लगायतका विविध शैक्षिक कार्यक्रमसहित वार्षिकोत्सब मनाएको हो।

कार्यक्रममा एसइइमा ग्रेडेड एवं उत्कृष्ट नतिजा ल्याउने विद्यार्थीहरूलाई नगद र प्रमाणपत्रसहित सम्मान गरिएको थियो। विद्यालयका प्रधानाध्यापक गीता रोका क्षेत्रीले वार्षिक प्रगती प्रतिवेदन पेश गर्दै शैक्षिक गुणस्तर वृद्धि नै विद्यालयको प्रमुख लक्ष्य भएको बताउनुभयो। कार्यक्रममा एसईइमा शतप्रतिशत नतिजा ल्याउन सफल विषय शिक्षकहरू तारा बहादुर थापा, कृष्ण चन्द्र सहनी, गीता रोका क्षेत्री, रिवन विश्वकर्मा र नैना बहादुर गुरूङलाई सम्मान गरिएको थियो। वार्षिकोत्सब विशेष खेलकुद प्रतियोगिताका विजेताहरूलाई मेडल र शैक्षिक पुरस्कारसहित सम्मान गरिएको थियो।

नगर प्रमुख गोविन्द कुमार कर्माचार्यले शिक्षक विद्यार्थी र सरोकारवाला सबैलाई शैक्षिक गुणस्तर वृद्धिमा ध्यान दिन र बालमैत्री वातावरण सृजना गर्न अनुरोध गर्नुभएको थियो। सामुदायिक विद्यालयको शैक्षिक गुणस्तर सुधारमा सबैखाले सहयोग गर्न नगर तयार रहेको उहाँको भनाई छ। विज्ञान शिक्षक सावित्री कार्कीको नेतृत्वमा भएको विज्ञान प्रदर्शनीबाट उत्साहित हुनुभएका उहाँले विद्यालयलाई ५० हजार नगद पुरस्कार दिने घोषणा समेत गर्नुभएको छ।

कार्यक्रममा ढापुक बहुउद्देश्यीय सहकारी संस्थाका अध्यक्ष पूर्ण बहादुर के.सी. , संस्थापक सदस्य मन प्रसाद गुरूङ, बालमैत्री नगर संयोजक विष्णुमाया काफ्ले , नगर प्रवक्ता दिपेन्द्र के.सी., युवा समाजसेवी एवं चन्दादाता विश्वनाथ अर्याल, बालोदय मा.वि. का प्रधानाध्यापक अमृत अर्याल, भाग्योदय मा.वि. का प्रधानाध्यापक रेशमलाल खनाल, वडा नं ८ का अध्यक्ष नन्दलाल खनाल, निवर्तमान  नगर प्रमुख छायाराम खनाल लागायतले शुभकामना मन्तव्य राख्नुभएको थियो। विद्यालय व्यवस्थापन समितिका अध्यक्ष चित्र बहादुर राना भूजेलको अध्यक्षतामा भएको कार्यक्रममा स्वागत शिक्षक सूर्य प्रसाद पंगेनी र संचालन नारायण प्रसाद कोइरालाले गर्नुभएको थियो।